«Даңқ – мәңгілік! Дәстүр – жалғасын тапсын!»

7 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель May 14, 2025

Ұлы Жеңістің 80 жылдығына орай Теміртауда бірқатар мерекелік іс-шаралар өтті – тыл еңбеккерлеріне құттықтаулар жолданды, Ұлы Отан соғысының жалғыз ардагері Николай Семенович Куриленкоға құрмет көрсетілді, концерттер ұйымдастырылды және, әрине, теміртаулық жауынгерлерге арналған ескерткішке гүл шоқтарын қою рәсімі өткізілді.
Қала әкімі Ғалым Әшімов осы мерекелік таңертең қаладағы жауынгерлер ескерткішінің алаңына алғашқылардың бірі болып әріптестерімен бірге келіп, бейбіт аспан үшін күрескен батырларды еске алды.
Ғалым Әшімов, Теміртау қаласының әкімі: «Бүкіл ардагерлерге, тылда болған азаматтарға сый-сияпаттардың бәрі белгіленгендей берілді. Қасымызда — біздің Теміртау қаласында қалған жалғыз ардагеріміз. Мерекемен бүкіл Теміртау халқын шын жүректен құттықтаймын».
Алаңға көп адам жиналды – барлығы да өз отандастарына және Ұлы Отан соғысына қатысқан барлық жауынгерлерге құрмет білдіру үшін келді. Өйткені майданда қазақстандықтар ерлікпен көзге түсті. Көптеген жерлестеріміз ордендермен, медальдармен және құрметті атақтармен марапатталды. 520 адам – Кеңес Одағының Батыры атағын иеленсе, Даңқ орденінің иегерлері – 110 мың сарбаз. Қазақстандық ұшқыштар Талғат Бигелдинов, Леонид Беда, Иван Павлов және Сергей Луганский Кеңес Одағының Батыры атағын екі рет алған. Әлия Молдағұлова мен Мәншүк Мәметованың есімдері – ерліктің не екенін естіген әрбір адамның жадында. Себебі соғысқа 9,5 мың қазақстандық әйел қатысқан болатын.
«Қазақстанымызда көп ардагерлер бар. Сол кісілерді құрметтеу керек. Халқымыздың жас балалары, жасөспірімдеріміздің дені сау болып, 1941–1945 болған оқиғаны көрмесін. Әрқашанда тыныштық болсын».
9 Мамыр – халықтық мереке деп бекер аталмаған. Себебі Гитлер армиясына қарсы бір ғана ел немесе ұлт емес, көптеген халықтар күресті. Арадан 80 жыл өтсе де, Ұлы Жеңіс мерекесі – ең әсерлі, қасиетті және жан тебірентерлік күн болып қала бермек.