Алматы облысында 21 жастағы қыздың денесі ерлер дәретханасынан табылды

Алматы облысында ерлер дәретханасынан асылған күйінде табылған 21 жастағы Диана Сансызбайдың анасы полиция жұмысына наразы. Кенжесінен айырылған әйел баласы өзіне қол салды дегенге сенбейді. Себебі оқиға болар алдында бойжеткен анасымен концертке бармақ болған. Мән-жайды әріптесім Оразай Нұртайұлы анықтады.
- Айдаладағы ер адамның туалетінде өледі. Бір таза жерде емес. Өлемін десе жолдың бойында ағаш толып тұр ғой. Неге ол именно сол туалетте өледі?!
Маусымның 29-ы Ұзынағаштағы дүкен жанындағы дәретханадан денесі табылған Диана Сансызбайдың анасы қызы өздігімен асылып өлді дегенге сенбейді. Өйткені бір күн бұрын бойжеткен анасына сыйлықтар жасап, сұлулық салонына апарып, екеуіне концертке билет алған екен. Жұмысын аяқтаған соң ағасына баруы керек болыпты. Бірақ түнде байланыс үзіліп, ертесі таңда суыт хабар жеткен. Сөзге сенсек, полицейлер Ұзынағаштан табылған сүйекті Қаскелеңдегі мәйітханаға тапсырыпты.
ҚАРАКӨЗ ҚАЛЖАНОВА, марқұмның анасы:
- Үстінде киімі де жоқ. Тек қана іш киіммен жатыр. Шашының бәрі алба-жұлба. Шөп-шалаң арасы. Мойнын бұрайын десе бұрылмайды, бір жағына қисайып қалған. Мына жауырыны мен арқасында көкпеңбек із тұрды. Дөңгелек пішіні. Екі қолын былай қысып алған. Сақинасы тұр, бірақ мойнындағы цепочкасы жоқ. Бір қолы көгеріп кеткен. Белінен төмен қарай көкпеңбек. Не болғанын білмеймін.
Қаза болған Диананы соңғы рет дүкеннен көрген. Ол жиендеріне ойыншық сатып алып шығып кетіпті. Қайтар жолда, анасының айтуынша, бойжеткен телефонмен сөйлесіп кейін дәретхана жаққа қарай жол тартыпты. Бірақ ол жақтан кері шықпаған.
ОРАЗАЙ НҰРТАЙҰЛЫ, тілші:
- Анасының айтуынша, 21 жастағы қызының денесі дәл осы дүкен маңындағы ерлер дәретханасынан табылған. Асылған күйінде тұрған бойжеткенді еден жуушы көріп, полиция мен жедел жәрдемге хабар беріпті.
ЕСЕН ҚАЛЖАН, марқұмның ағасы:
- Міне жіптің ізі. Осылай артқа қарап тұрған. Астында ештеңе жоқ. Соткасы мына бұрышта, сөмкесі мына бұрышта. Есік жабық. Болды. Адам өлер кезде ең құрмағанда еңкейеді ғой. Ол осылай түп-түзу тұр. Ал жеке заттарын біз өзіміз сайдан таптық. 1 ай тергеушінің артынан жүгіріп жүріп, ал ал деп өткіздік. Біздің тергеуші дым істеген жоқ. Қаншама рет бардық, кірдік. Бастығына да жүгіндік. Ол бізге: "Киімін алу үшін отказной жазып беріңдер" деп шарт қойды. Болды.
Ағасының сөзінше, дәретхананың қабырғасы биік, Диананың жіп ілуге бойы жетпейді. Туыстары оқиға орнында тағы басқа адамдардың болғанына сенімді.
ҚАРАКӨЗ ҚАЛЖАНОВА, марқұмның анасы:
- Бір қыз айтты. "Апай, қай уақытта өлді?" деп сұрады. Түнгі 12-де десем, "Қалай 12-де өледі, мен 2-ден 5 минут өткенде туалетке бардым. Сол туалетке келе жатқанымда мына жағында бір қара машина, қасында тағы бір ақ машина, 4 бала шемішке шағып, қарқылдап күліп тұрды" деді.
Полицияның хабарлауынша, "Өзін-өзі өлтіруге дейін жеткізу" бабы бойынша қылмыстық іс тіркеліп, бүгінде тергеу жүріп жатыр. Қыздың анасы Диананың сөмкесіндегі 100 мың теңге мен алтын алқасы жоғалған дейді. Қара жамылған отбасы бойжеткенді қасақана өлтірді деп санайды.
#Информбюро #31арна #БастыЖаңалықтар #Новости #31канал