Алматы полицейлері "іздеуі жоқ" деп жерлеп тастаған Ғалымжан Кәрімовке эксгумация жасалды

8 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель Feb 16, 2026

Алматы полицейлері "іздеуі жоқ" деп жерлеп тастаған Ғалымжан Кәрімовке эксгумация жасалды. Осыдан екі ай бұрын із-түссіз жоғалған жігіттің денесі мәйітханаға сараптамаға жіберілді. Өлімге Талғар ауданы полицейлерінің қатысы болуы мүмкін деген күдік бар. Өйткені 27 жастағы Ғалымжан құзырлы органдар қылмыстық іс бойынша сұрақ-жауап алғаннан кейін өзіне қол салған. Ал соңғы хатында қызметкерлердің азаптағанын жазып кетіпті.
Бұл 27 жастағы Ғалымжан Кәрімовтің өзіне қол салар алдындағы соңғы хаты. Жазбада ол өзін Талғар ауданының полицейлері бейнебақылау камерасын жауып, басына пакет кигізіп аямай ұрғанын, артынша медициналық сараптамадан өткізгенін жазады. Марқұм хатында ата-анасынан кешірім де сұраған. Кейін көшеге шығып кетіп, сол күйі оралмайды. 2 күн хабар ала алмаған соң алаңдаған анасы Алматыдағы Алатау ауданының полициясына жүгініп, іздеу жұмысы басталады.
ГҮЛНӘР МУМИНОВА, марқұмның анасы:
- 1 айдан бері іздейді. Ал Жетісу ауданы менің баламды іздеуі, сұрары жоқтай мына аты-жөні белгісіз зиратқа жерлеп тастайды. 40 күннен кейін маған хабарласып "Иманы саламат болсын, ұлыңыз қайтыс болып кеткен" дейді. Қашан десем 25 желтоқсан күні деп айтты.
Марқұмның жақындарының айтуынша, Жетісу ауданының полициясы көзден таса жерде өзіне қол салған Ғалымжанның денесін сол күні-ақ тапқан. Бірақ хабар бермеген. Енді жақындары шарқ ұрып іздеген ұлдарының денесі 50-ден астам күн өткенде анықталып, қайта қазып алынды. Ал Жетісу аудандағы полицейлердің әрекетіне қатысты тексеріс жүргізілмек.
САЛТАНАТ ӘЗІРБЕК, Алматы қаласы полиция Департаментінің ресми өкілі:
- Қандай да бір полиция тарапынан қателіктер табылатын болса онда міндетті түрде Қазақстан Республикасының заңнамасы аясында шешім қабылданатын болады.
Негізі әңгіменің әлқиссасы талғарлық 14 жастағы баланың ата-анасы Ғалымжан Кәрімовтің үстінен жазған арыздан басталған. Осы шағым негізінде Талғар ауданының полициясы 27 жастағы жігітті қылмыстық істі ресми түрде тіркемей жатып ұстап, тергеу жүргізген. Оны құзырлы органның өзі де мойындады. Марқұмның әкесінің айтуынша, полиция ұлын ұрып-соққан соң көлігі мен телефонын тәркілеп, үйіне жібере салған. Ал қылмыстық істі 3 күн өткеннен кейін ғана тіркепті. Сол кезде Ғалымжанға 16 жасқа толмаған адамға сексуалдық сипаттағы әдепсіз әрекеттерді жасау бабы бойынша іс қозғалыпты.
ШЕРЗАТ МУМИНОВ, марқұмның әкесі:
- Балам ондай қылмысқа баруы мүмкін емес. Баламның үстінен іс қозғағаны оперлердің жалған әрекеті. Қысым көрсеткені анық. Балам сол үшін де өзіне қол жұмсады деп ойлаймын.
Оқиғаға қатысты енді Алматы облысының прокуратурасы іс қозғады. Эксгумация жасалған денеге қайта сараптама тағайындалды. Марқұмның жақындары жан-жақты, әділ тергеу болғанын талап етеді.
#Информбюро #31арна #БастыЖаңалықтар #Новости #31канал