Алтын құрсақты аналар ауылы

Қызылорда облысындағы Еңбек елді мекені «Батыр аналар ауылы» деп аталады. Себебі, аядай ғана ауылда 100-ге жуық көпбалалы ана бар. Олардың 43-і Алтын, 54-і Күміс алқа иегері. Ауылдағы алтын құрсақты аналардың алды 18 перзент сүйсе, ең кемі 7 бала өмірге әкелген. Бір ерекшелігі, Еңбектің еңкейген қариясынан ес білген баласына дейін еңбекқор әрі өнерге жақын.

Ана туралы әнді нақышына келтіре шырқап отырған Еңбек ауылының алтын құрсақты аналары. Арасында 11 құрсақ көтерген Батыр ана Тазагүл Қазбекова да бар. Сексеннің сеңгіріне шыққан кейуана әлі күнге дейін еңбектен қол үзген жоқ. Ізіне ерген ақжаулықтыларға ақыл кеңесін айтып, немерелері мен шөберелерін қолөнерге баулып жүр.

ТАЗАГҮЛ ҚАЗБЕКОВА – «АЛТЫН АЛҚА» ИЕГЕРІ \Әрине, аналардың кейінгі жастарға айтар ақылы, үлгілері көп. Бала күтуде, бала тәрбиелеуде, үй болуда. Шүкір Аллаға, балдардың қызығын көріп аман сау жүріп жатырмыз. Кейінгі ұрпақтар әрі қарай жалғастырады деп ойлаймыз\

Еңбек ауылының аналары бесаспап. Қолынан келмейтіні жоқ. Солардың бірі Айнұр Доспенбетова құрақ құраудың һас шебері. Ісмер келіншек мемлекеттік бағдарлама арқылы 1 миллион теңге қайтарымсыз грант алып, кәсіп бастапты. Қазір қолөнер бұйымдарына сұраныс жоғары, алты баламның нәпақасын адал еңбекпен тауып отырмын, - дейді.

АЙНҰР ДОСПЕНБЕТОВА - «КҮМІС АЛҚА» ИЕГЕРІ \Ұршық иіруді үйрендік, жүн түтуді үйрендік. Бәрін үйреніп келе жатырмыз осы кісілердің арқасында. Құрақ тігем, прямой көрпешені де тігемін, перде тігіп беремін. Бесіктің жасауын тігемін\

Осыдан 35 жыл бұрын бұл елді мекенде «Батыр аналар» ансамблі құрылған болатын. Содан бері бұл шығармашылық ұжымда үшінші буын алмасқан. Өнерлі аналар түрлі облыстық, республикалық байқауларға қатысып, ауыл мерейін үстеп етіп жүр.

АЛТЫН МАМАДАЛИЕВА – «БАТЫР АНАЛАР» АНСАМБЛІНІҢ ЖЕТЕКШІСІ \Трио, квартет болып өлең айтады, домбырамен айтады, гитарамен айтады қыздарым. Жеке ән орындаймыз, екі дауыста айтамыз, хормен айтамыз. Енді үлкен батыр аналардан көрген жұмысымызды жалғасытырып жатырмыз. Әніміз жақсы, көңіл күйіміз өте жақсы\

Тағы бір ерекшелігі, соңғы жеті жылдың көлемінде Еңбекте ешқандай қылмыс тіркелмеген. Мұны даналықтың бастауы аналардың ақылы, тағлымды тәрбиесінің арқасы деп ұғындық. Жастары еңбекпен есейіп, ұлттық тәрбиемен сусындаған ауылдың бүгінгі келбеті міне, осындай!

Сайт - https://qyzylordatv.kz/ru/live
Facebook - https://www.facebook.com/qyzylordatv/
VK - https://vk.com/qyzylordatv
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/