Астананың әлеуметтік даму басымдықтары белгіленді

Бас шаһарды кешенді дамыту мәселесі үкіметтің жіті назарында.
Премьер-министрдің орынбасары – Мәдениет және ақпарат министрі Аида Балаева салалық ведомстволар мен қалалық әкімдік басшыларымен кездесіп, дамуы қарқын алған қаланы басқарудың негізгі міндеттері қаралды.
Қала әкімдігінде өткен кеңесте білдім беру мәселесіне баса назар аударылды. Шаһар әкімі Жеңіс Қасымбек мектептердің инфрақұрылымын дамытуға қатысты ағымдағы жұмыстарды тоқталды. Астана қаласында мемлекеттік, жекеменшік санаттағы 208 мектеп бар. Жыл сайын 10 мектеп салу қажеттілігі бар.
Вице-премьер  білім беру саласындағы негізгі мәселелерге тоқталды. Оның ішінде орта білім беру мен бастауыш мектептерін дамыту бағдарламасын жүзеге асыру, заманауи цифрлық шешімдерді енгізу, сондай-ақ, астаналық білім ошақтарына жасанды интеллектіні  енгізу бар. Сонымен қатар білім беру ұйымдарындағы ішкі саясат пен тәрбие ісінің тұжырымдамасын енгізуге мән берілді.
Жиын барысында Аида Балаева білім беру саласындағы басқару жауапкершілігі мектеп директорына жүктелетінін атап өтті. Негізгі талаптар сапалы білім беру, оқушылардың қауіпсіздіігі мен мектептердің инфрақұрылымына қойылады.  Бұл талаптар орындалмаған жағдайда, білім беру ошақтарының жетекшілері өз орындарын босатуға міндетті. Сонымен бірге мектепке дейінгі білім беру саласын ретке келтіру , оның ішінде талаптарды қатаң сақтану мен лицензиялау мәселесітілге тиек етілді.
Кеңесте жоғарғы білім беру мәселесі жеке қаралды. Астана аймақтағы академиялық-ғылыми хаб ретінде қалыптасып келе жатыр. Бұған әлемдік  жетекші университеттер филиалдарының ашылғаны сеп болды. Вице-премьер қаланың әлеуметтік дамуына серпін беру мақсатында ғылымның соңғы жетістіктерін қолдану маңыздылығын атап өтті.
Кеңесте қаланың туристік әлеуетін дамыту мәселесі де талқыланды. Биыл Астанаға 1 миллионнан астам турист келген. Саланың өсімі 9 пайызды құрады. Әсіресе оқиғалық туризмге басымдық беріліп отыр. Сонымен қатар халықаралық деңгейдегі іс-шараларды өткізуге арналған заманауи инфрақұрылым қалыптастыру және «Сарыарқа» велотрегі мен  бірқатар спорт нысандарын кезең-кезеңімен жаңарту қажеттігі айтылды. 
Денсаулық сақтау саласында негізгі басымдық емханалар жұмысының тиімділігін арттыруға берілді. Бұл бағытта медициналық көмек мұқтаж азаматтарға ғана көрсетілуі тиіс. Аида Балаева қызмет сапасына қатаң бақылау орнатуды тапсырды. Оның айтуынша, бұл салаға қомақты бюджет қаражаты бөлінеді, сондықтан әрбір жұмсалған теңге халық үшін нәтиже беруі тиіс. Қазіргі таңда елордада 277 медициналық ұйым жұмыс істейді. Алдағы үш жылда тағы сегіз денсаулық сақтау нысанын салу жоспарланып отыр. Сондай-ақ алғашқы медициналық көмекті дамыту, салауатты өмір салтын насихаттау және азаматтардың өз денсаулығына  жауапкершілігін күшейту маңызды. Бұдан бөлек, балалар медицинасының даму бағдарламасын әзірлеу және міндетті әлеуметтік медициналық сақтандыру жүйесіне халықтың қатысу аясын кеңейту  белгіленді.
Сонымен қатар вице-премьер әлеуметтік қолдау мәселелеріне назар аударды. Көмек шын мұқтаж азаматтарға ғана көрсетілуі тиіс. Бюджет қаржысының біршама бөлігімен көрсетілетін әлеуметтік қызметтердің сапасын бақылау ерекше маңызға ие.
Кездесуде Аида Балаева елорданың қоғамдық кеңесінің мүшелерімен де кездесті. Халықтың әлеуметтік осал топтарын қолдау, ономастика және жастардың рухани тәрбие мәселелері талқыланды. Қоғамдық кеңестердің әлеуметтік саясатты дамытудағы маңызды рөлі атап өтілді.
Шара соңында Премьер-министрдің орынбасары мүгедектігі бар балалар мен психоневрологиялық ауытқуға ұшыраған ересектерге әлеуметтік қызмет көрсететін "Жансая" орталығына барды. Министр оңалту, бейімдеу және жартылай стационар форматында оқытатын әрі үйге барып көмек көрсететін мамандардың жұмысымен танысты.

#жаңалықтар #новости #24KZ #хабар24 #казахстан