Атырауда мүгедектігі бар 600-ден астам адам оңалтудан өтті

13 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель Aug 27, 2026

Атырауда мүгедектігі бар 600-ден астам адам оңалтудан өтті

Атырауда мүгедектігі бар азаматтарға медициналық және әлеуметтік оңалту қызметтері көрсетілуде. Жыл басынан бері «Мүгедектерді сауықтыру облыстық орталығына» 15 жастан асқан 623 азамат жүгініп, түрлі бағыттағы көмек алған, - деп хабарлайды Өңірлік коммуникациялар қызметі.

Мұнда бір ғана ем-доммен шектелмей, азаматтың күнделікті өмірге қайта бейімделуіне қажетті қызметтердің барлығы қарастырылған. Атап айтқанда, тұрмыстық, медициналық, психологиялық, еңбек, мәдени және құқықтық бағыттар бойынша қолдау көрсетіледі.

Мекеме директоры Ғалия Бижанованың айтуынша, орталықтың басты мақсаты – қызмет алушылардың денсаулығын жақсартып қана қоймай, олардың өздігінен өмір сүруіне және қоғаммен араласуына мүмкіндік жасау.

– Орталық 2009 жылдан бері жұмыс істеп келеді. Үш қабатты ғимаратта қызмет алушыларға қолайлы жағдай жасалған. Екі лифт, пандус, көру қабілеті төмен азаматтарға арналған тактильді жолақтар мен Брайль қарпімен жазылған ақпараттық белгілер бар. Алыс аудандардан келетін азаматтарға 35 орындық стационарлық және 20 орындық күндізгі бөлім бар. Орталықта 75 маман қызмет жасайды, – деді Ғалия Бижанова.

Ал оңалту шаралары барысында физиотерапия, емдік дене шынықтыру, бассейнде жүзу, массаж, тұзбен емдеу және бальнеотерапия әдістері қолданылады. Арнайы тренажерлерде жеке және топтық жаттығулар да ұйымдастырылады. Қызмет алушылардың жағдайына қарай электр, жылу, бу, парафин және лазерлік терапия әдістері ұсынылады. Сонымен қатар олар күніне бес мезгіл тегін диеталық тамақпен қамтамасыз етіледі.

Орталықтың мүмкіндігі де биыл кеңейді. Мекеменің медициналық құрал-жабдықтары «Полимаг-02М» магнитотерапия аппаратымен толықты. Алдағы уақытта жаңа физиотерапиялық құрылғылар алу жоспарланып отыр.

Айта кетейік, орталыққа І және ІІ топтағы мүгедектігі бар азаматтар Әлеуметтік қызметтер көрсету порталы арқылы немесе жергілікті атқарушы органдардың жолдамасы негізінде қабылданады. Ол үшін жеке оңалту бағдарламасы мен медициналық құжаттары ескеріледі.

Айта кетейік, Атырау облысында барлық санат бойынша 28 115 мүгедектігі бар азамат бар. Оларға арнаулы әлеуметтік қызмет көрсету үшін өңірде 16 мемлекеттік мекеме мен 2 үкіметтік емес ұйым лицензия негізінде жұмыс істейді.