Атырауда "Экоәлем" клубының таныстырылымы өтті

Х.Досмұхамедов атындағы Атырау университетінде ҚР Президенті Қасым-Жомарт Тоқаевтың бастамасымен жүзеге асырылып жатқан «Таза Қазақстан» бағдарламасын қолдау мақсатында табиғатты қорғау мен экологиялық мәдениетті дамытуға бағытталған «Экоәлем» клубының таныстырылымы өтті,-деп хабарлайды Өңірлік коммуникациялар қызметі.

Жобаға 20 студент өздерінің үлесін қосуда. Клуб экологиялық мәселелерді шешуге атсалысып, ғылыми зерттеулерді қолдау мақсатында құрылған.

-«Таза Қазақстан» шеңберінде Атырау университетінде экоклубтың ашылуы осы бағытта жүзеге асырылып отыр. Бұған дейін экология кафедрасында үйірме жұмыс жасады. Экология кафедрасының қалыптасуына 20 жыл уақыт бойы студенттеріміз әртүрлі ғылыми жұмыстармен айналысып, олимпиадаларға қатысып келеді. Тек экологтар ғана емес, әрбір адам осы жұмысқа атсалысуы керек деп ойлаймын,-деді Техника ғылымдарының кандидаты, клуб жетекшісі Мансия Есенаманова.

«ECOCAMPUS» және «Колданбалы экология» білім беру бағдарламасының студенттері қамыс пен тағам қалдықтарынан өндірілен «Фитотері» жобасын және шыны қалдықтарын пайдалана отырып, эпоксидті шайырдан бұйымдарды жасау жобасын таныстырды. Бұл жобалар экологиялық мәселелерге жаңашылдық көзқараспен қарауды және қоршаған ортаны қорғауға арналған.

-«Экоәлем» клубы еріктілер арқылы өмірімізге әртүрлі экологиялық әдеттерді қалыптастыру, қалдықтарды дұрыс сұрыптау жұмыстарын жүргізеді. Университеттің әрбір кампусында экологиялық жәшіктер орнатылған. Бір-екі жылдың ішінде 1000 кг-нан астам қалдық тапсырған болатынбыз. Осы үлесіміз үшін алғыс хаттармен марапатталдық және Атыраудағы білім беру ұйымдарының үздік бестігіне кірдік. Сонымен қатар экологиялық тренингтер мен мастер-класстар тұрақты түрде өткізіліп тұрады»,- деді клубтың координаторы Жанерке Мұстахим.

Іс-шара соңында қатысушылар экологиялық мәдениетті дамыту, табиғатты аялау және қоғамды экологиялық белсенділікке тарту жолдары аясында пікір алмасты.