Атыраулық студенттер заманауи зерттеу әдістерін меңгермек

Сафи Өтебаев атындағы Атырау мұнай және газ университеті РФ Түмен облысының инвестициялық саясат және кәсіпкерлікті мемлекеттік қолдау департаменті директорының орынбасары Александр Горлатов бастаған делегациямен кездесті,- деп хабарлайды Өңірлік коммуникациялар қызметі.

Қонақтар қатарында Түмендегі университеттердің басшылары, инновациялық орталықтардың жетекшілері мен индустриялық компаниялардың өкілдері бар.
Делегация алдымен «КМГ Инжиниринг» компаниясының зертханасына барып, ғылыми зерттеулер мен инженерлік әзірлемелермен танысып, Сафи Өтебаев атындағы университет ұйымдастырған дөңгелек үстелге қатысты. Білім ордасының басқарма төраға-ректоры Гүлзада Шакуликованың жетекшілігімен өткен кездесуге ресейлік меймандармен бірге жоғары оқу орнының индустриалды комитетінің мүшелері, өндірістік серіктестер, үздік менеджерлер қатысты.

- Алдағы уақытта бірлескен зерттеу жобаларын жүзеге асыру, академиялық алмасу бағдарламаларын ұйымдастыру және білім беру саласындағы серіктестікті нығайту бойынша жаңа жобаларды жоспарлап отырмыз. Келіссөздердің нәтижесінде Түмен индустриалды университеті, Түмен мемлекеттік университеті ғылыми зерттеулер жүргізуге және заманауи зертханалар мен инновациялық орталықтарды біріктіре отырып, ортақ зерттеу жұмыстарын ұйымдастыруға дайын екенін білдірді, – деп атап өтті Гүлзада Шакуликова.

Кездесу барысында екіжақты ынтымақтастықты дамытуға қатысты бірқатар маңызды мәселе талқыланды. Гүлзада Шакуликова жоғары оқу орнының ғылыми және инновациялық әлеуеті туралы баяндама жасады. Өз кезегінде түмендік делегация ғылыми және инновациялық жетістіктерін, университетаралық кампус бағдарламасын, академиялық ұтқырлық мүмкіндіктерін және индустриялық серіктестік тәжірибесін таныстырды.

Жиында Атырау мұнай және газ университетінің индустриялық серіктестермен өзара іс-қимыл тәжірибесі және бірыңғай стартап студиясы туралы да айтылды. Бұл студия инновациялық жобаларды қолдау экожүйесін құруға, сондай-ақ жаңа технологияларды халықаралық нарыққа шығаруға бағытталған.