Атырау облысында ерлі-зайыптыларды айуандықпен өлтірді деген күдікті әлі табылған жоқ

Атырау облысында ерлі-зайыптыларды айуандықпен өлтірді деген күдікті әлі табылған жоқ. Полиция Сұлтан Сәрсемәлиевтің бейнебақылау камерасына түспегенін айтады. Сондықтан тәртіп сақшылары оның соңғы жарты жылда жүріп өткен жерлерін түгел тінтіп жатыр. Барлық күш қалаға жұмылдырылған. Жоғалған бір үйдің үш адамы туралы да әзірге іліп алар ақпарат болмай тұр. Құзырлы орган өкілдері Жангелдин ауылы мен сезікті тұрған үйдің айналасын қопарып, қазба жұмыстарын да жүргізіпті. Бірақ ешқандай нәтиже жоқ. Ал, сараптамада ерлі-зайыпты марқұмдардың денесінен пышақ іздері табылыпты.
Махамбет ауылы тұрғындарының көбі сүйіп алған жарының жақындарын өлтірді деп күдікке ілінген Сұлтан Сәрсемәлиевті жақсы танитын болып шықты. Тоғызыншы сыныпты бітірген, тіпті әскерге барып отан алдындағы борышын да өтеп келген деп отыр. Сондықтан тыныш отбасының ұлдары адам айтқысыз жауыздыққа барады дегенге көпшілік сене алмай жүр.
АҚМАРАЛ ОЙЫЛДАНОВА, Махамбет ауылының тұрғыны :
Бала тұйық. Сондай жасайды дегенге сене алмаймыз енді. Түсініксіз жағдай ғой. Өте қиын жағдай естіп отқан соң. Қарапайым еңбек адамдары ғой. Өте тәрбиелі жанұяда өскен бала ғой.
Қазір іздеуде жүрген Сұлтан Сәрсемалиевтің бес баласын зейнеттегі ата-анасы қарап отыр. Ең үлкені 10 жаста, кішісі бір жаста. Білім бөліміндегілер жағдай бақылауда. 2 және 3 сыныпта оқитын ұл-қыздармен психологтар жұмыс істеп жатыр дейді.
ВЕНЕРА ҚАБЫШЕВА, Махамбет ауданы білім бөлімінің басшысы:
Балаларға мектеп, білім бөлімі тарапынан, сонымен қатар отбасын қолдау орталығы, психологтар тараптан жан-жақты көмектер көрсетіліп жатыр. 2-3 сыныпта оқитын оқушылардың сабақ үлгерімдері жақсы. Түрлі шараларға белсене қатысады.
Полиция Сұлтан Сәрсемалиев пен Ақбаян Мұқанғалиеваға халықаралық іздеу жариялаған. Қазір құзырлы орган өкілдері күдікті соңғы жарты жылда барған қала ішіндегі барлық нысандарды аралап жүр. Бейнекамералардағы жазбалар да зерттелуде.
МЕЙІРІМ ЕРДӘУЛЕТ, Атырау облыстық полиция департаментінің баспасөз хатшысы:
Біреуіне із-түссіз жоғалу дерегімен осы отбасының қызы және оның күйеуі күдікті ретінде танылып, оған күдікті ретінде халықаралық іздеу жарияланды. Қазіргі таңда олардың қала аумағындағы жүрген іздері бойынша, яғни 4- 5 айдың шамасындағы, 2-3 ай шамасында жүрген іздері бойынша барлық жерлерді тінту іздестіру, қандай да бір ақпаратты алу бағытындағы жұмыстарды жүргізуде.
Ал, ізім-ғайым жоғалған 35 жастағы мүгедектігі бар Мейрамгүл Қарабалиева мен 32 жастағы Наурыз Мұқанғалиевті Жангелдин ауылында іздестіру тоқтатылыпты. Себебі, құтқарушылар мен тәртіп сақшылары елдімекен іші мен айналасын түгел сүзіп, ештеңе таппаған.
ЖҰЛДЫЗ ТІЛЕУХАН, тілші :
Полиция мәліметінше, күдікті соңғы жылдары дәл осы аядай ғана баспананы жұбайымен бірге жалдап тұрған. Қазір бұл аумақта ешкім жоқ. Құзырлы орган өкілдері айналаны қопарып, қазып тастағанын көруге болады. Жер астындағы нысандарды анықтайтын георадар да іске қосылыпты. Алайда іздестіру жұмыстары ешқандай нәтиже бермеген.
Полиция атыраулық хакерді де әлі ұстаған жоқ. Ішкі Істер министрлігі дүйім елді алаңдатқан жағдай бойынша барлық күш жұмылдырылғанын айтады. Ал, марқұмдардың жақындары жоғалған отбасы мүшелерінің барлық телефондарын күдікті ұстап отыр деп топшылайды. Себебі, жазылған смс хаттарға Наурыздың байланыс телефонынан әлдекімдер жауап береді екен. Тіпті көз жұмған анасының атынан да соңғы рет жетінші қарашада туыстар чатына "Қалдарың қалай? Бүгін жұма, ауырмаңдар, аман болыңдар" деген жазба келген. Еске салсақ, өткен аптада ерлі-зайыпты Мақсот Қарабалин мен Нәсіп Өтешқалиеваның денесі үйлерінің ауласындағы сарайдан табылған болатын. Сараптаманың алдын ала қорытындысы бойынша зейнеткерлердің денесінде пышақ іздері бар екен.

#Информбюро #атырау #БастыЖаңалықтар #күдік #31канал