Атырау облысында тұрғын үйде жойқын жарылыс болып бес адамды күйік шалды

Атырау облысында мереке күндері жер үйлердің бірінде газ баллоны жарылып, бір адам көз жұмды. Денесінің 60 пайыздан астамын күйік шалған бір отбасының тағы төрт мүшесі ауыр халде ауруханаға жеткізілген. Жансақтау бөлімінде жатқандардың екеуі бала. Жойқын жарылыстың соңы өртке ұласып, баспананың күл-талқаны шыққан. Құтқарушылар газ ауа қоспасының дүмпуінен от тұтанды деген болжам жасады. Қазір арнайы комиссия құрылып, өрттің шығу себебін анықталып жатыр. Толығырақ өңірдегі әріптесім Жұлдыз Тілеухан айтып берсін.
Жойқын жарылыс қала іргесіндегі Көкарна ауылындағы тұрғын үйлердің бірінде кеше болған. Қатты дүмпудің соңы өртке ұласып, бүтін бір отбасының бес адамы күйіп қалды. Тілсіз жау 140 шаршы метр аумақты жалмаған. Құтқарушылар жеткенше баспананың қабырғалары қирап, күл-талқаны шыққан. Төтеншеліктер тілсіз жауды бір сағатта әрең ауыздықтады.
ҒАБИТ БАБАЕВ, Атырау қалалық төтенше жағдайлар басқармасының бастығы:
– ТЖБ қызметкерлерімен 7 қазан күні осы оқиға орын алған тұрғын үйге профилактикалық түсіндірме жұмыстары жүргізілген. Болжаммен газ жиналып жарылған. Сараптама қорытындысымен өрттің толық себебі белгілі болады.
Жедел жәрдем қызметімен ауруханаға бір отбасының бес мүшесі жеткізілген. Ауыр жарақаттан 59 жастағы азамат бүгін жан тапсырды. Денесінің 60 пайыздан астамын күйік шалған тағы төрт адамның жағдайы ауыр дейді ақ халаттылар. Зардап шеккендердің екеуі бала.
БІРЖАН БАҚТЫГЕРЕЕВ, Атырау облыстық ауруханасының дәрігері:
– 1970 жылғы азаматша 95 пайыз күйік жарақатымен және 2002 жылғы азаматша 60 пайыз күйік жарақатымен жатыр. Жағдайлары қазір өте ауыр. Емдерін әзірше жансақтау бөлімінде жалғастырады. Керек жағдайда ғана Астанадағы ситуационный центрге шығамыз.
Қазір арнайы комиссия құрылып, өрттің шығу себебі мен шығын көлемі есептеліп жатыр. Төтенше жағдай департаментінің қызметкерлері қызыл жалынның құрсауында қалған үйге кіріп, түсіндіру жұмыстарын жүргіздік деп отыр. Бірақ өрт қауіпсіздігіне бей-жай қарайтын жандардың кесірінен өңірде кісі өлімі азаймай тұр. Мәселен, өткен жылы қала бойынша 152 өрт тіркеліп, 4 адам қаза тапқан.





Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#Информбюро #31арна #Жаңалықтар #БастыЖаңалықтар #Нашиновости #Сегодня #Қазақстан #31канал