Атырау облысы Жылыой ауданының тұрғындары үйлерінің апатты деп танылуын қалайды

Атырау облысы Жылыой ауданының тұрғындары үйлерінің апатты деп танылуын қалайды. Өйткені, 40 жыл бұрын ағаштан салынған екі қабатты бес үйде бүгінде тұру мүмкін емес. Қабырғасы қақырап, шатыры мен едені шұрық-тесік үйді жұрт шама-шарқынша жамаумен әлекке түседі. Ал шенеуніктер бұл үйлердің апатты екенін алдымен дәлелдеу керек деп қысқа қайырды.
Жылыой ауданының қақ ортасында ағаштан салынған екі қабатты бес үй бар. 40 жыл бұрын бой көтерген баспанада көбіне зейнеткерлер мен көпбалалалы аналар тұрады. Сұрқы кеткен үйдің есік-терезесі сынған, қабырғасы қақырап, іргетасы шөккен. Едені де шұрық-тесік. Жұрт сарышұнақ аязда пәтер ішін жылыту өте қиын деп мұңдарын шақты.
ЖҰМАЗИЯ ТӘҢІРБЕРГЕНОВА, Жылыой ауданының тұрғыны:
– Қабырғаларының барлығы түсіп жатыр. Терезелері анау аңғал-саңғал. Тұратын ешқандай жағдай жоқ. Бала да, шаға да тұра алмайды мынаның ішінде. Біздер енді жаңа үй талап етеміз. Жаңа үй беруі керек кой. Ешқандай жылу жасамайды. Жан-жағының барлығы ашық, тесік, төбесі түсіп жатыр.
АҚЖАРҚЫН ҚАЛЫШОВА, Жылыой ауданының тұрғыны:
– Бүкіл әкімге кіріп шықтым. Ешқандай мәселе шешілмейді. Акимат аварийныйға жатқызбай отыр. Жұмысқа кеткен сайын үреймен отырамыз. Жанымызды шүберекке түйіп. Балаларымызға балконға шықпа-шықпа деп айтып кетемін Зал сап-салқын. Қап-қалың носкимен жүреміз. Балаларымызды солай қап-қалың киіндіріп қоямыз.
Тұрғындар ескі баспананы қайта-қайта жамап шаршағандарын айтады. "Үйімізді апатты деп танысын" деген талаппен халық талай табалдырық та тоздырған. Алайда әкімдіктегілер бұл үйлерді сүруге асығар емес. Шенеуніктер бұқара өз қаражатына арнайы маман шақыртып, сараптама жүргізу керек деп отыр. Соның қорытындысына қарай шара қолданатындарын жеткізді.
САЯН БАСИЛОВ, Жылыой аудандық тұрғын үй инспекциясы бөлімінің басшысы:
– Тұрғындар бірлесіп техникалық обследование дейді, сараптамалық жұмыстарын жүргізетін маманды жалдап, бұл тұрғын үйдің апатты екенін дәлелдеулері керек. Маманның зерттеуі қажет. Егер бұл үй апатты деп танылған жағдайда тұрғын үй кезегіне қоямыз. Немесе басқа да салынып жатқан пәтерлер болса соны беруге тырысамыз.
Бір анығы, бұл үйде қорқынышпен өмір сүріп жатқан қарашаның мәселесі биыл шешілмейді. Жалпы, Жылыой ауданында тозығы жеткен 132 үй бар.







Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал