Атырау қаласында шетелдік ЖОО филиалдарының көрмесі өтуде

Атырау қаласында шетелдік ЖОО филиалдарының көрмесі өтуде

Атырауда 7-8 сәуір аралығында білім саласындағы маңызды жобалардың бірі – «Study in Kazakhstan» халықаралық көрмесі өтуде. Іс-шара ҚР Ғылым және жоғары білім министрлігі мен Атырау облысы әкімдігінің қолдауымен ұйымдастырылып отыр, - деп хабарлайды Өңірлік коммуникациялар қызметі.

Көрменің ашылуында сөз сөйлеген Атырау облысы әкімінің орынбасары Дарын Шамұратов жастарға ыстық лебізін білдірді:
- Бұл көрме – болашағын енді айқындап жатқан түлектер үшін үлкен мүмкіндік. Университеттермен бірлесіп әкімдік тарапынан талапкерлерге білім гранттарын бөлу жоспарда бар. Оқушыларға ақ жол тілеймін. Болашақ мамандықты дұрыс таңдай отырып, өмірлік жолды сапалы қалыптастыруға болады. Бұл көрме шетелдік университеттердің филиалдарымен тікелей танысуға тамаша мүмкіндік,- деді Д.Шамұратов.

Жобаның мақсаты – қазақстандық талапкерлерге еліміздегі шетелдік жоғары оқу орындарының филиалдарымен танысуға мүмкіндік беру және өз елінде сапалы, халықаралық деңгейдегі білім алуға жол ашу. Президент тапсырмасына сәйкес жүзеге асып жатқан бұл бастама шетелге шықпай-ақ қос дипломдық білім алуға мүмкіндік береді.
Ғылым және жоғары білім министрінің кеңесшісі Руслан Емелбаевтің айтуынша, 2022-2024 жылдар аралығында министрлік 23 стратегиялық серіктестік орнатқан, биыл тағы 11 жоба іске асуда. Бүгінде елімізде 30-дан астам шетелдік жоғары оқу орнының филиалдары мен қос дипломдық бағдарламалары табысты жұмыс істеп келеді.

- Бүгінгі көрмеге 20-дан астам шетелдік ЖОО филиалдары келіп отыр. Барлық филиалда мемлекеттік грант негізінде білім алу мүмкіндігі қарастырылған. Әр университеттің қабылдау талаптары әртүрлі, бірақ басты шарт – ағылшын тілін меңгеру. Президент тапсырмасына сәйкес биыл батыс өңіріне төртінші жыл қатарынан 500 грант бөлініп отыр. Оның ішінде 100-ге жуығы педагогикалық бағытқа тиесілі, – деді Р. Емелбаев.

Көрмеге қатысушы шетелдік оқу орындарының бірі — Heriot-Watt University (Ұлыбритания) Ақтөбе облысында екі жыл қатарынан жұмыс істеп, 400-ге жуық студентке білім беруде. University of Arizona (АҚШ) Петропавл қаласындағы Манаш Қозыбаев атындағы Солтүстік Қазақстан университетімен серіктестік орнатты. Сонымен қатар биыл SeoulTech (Оңтүстік Корея) Қорқыт Ата атындағы Қызылорда университетімен жасанды интеллект бағытында қос дипломдық бағдарламасын іске қоспақ.

Көрме аясында Қазақ ұлттық су шаруашылығы және ирригация университетінің таныстырылымы өтті. Бұл университет Тараз қаласында су тасқыны мен су ресурстарын тиімді басқару бағытында білім берудің жаңа үлгісін ұсынуда. 30 білім беру бағдарламасы, 15 магистратура мен 5 докторантура бағыты қамтылған. АҚШ, Швейцария, Венгрия және Ресей елдерімен бірлескен академиялық жобалары бар.

– Басты мақсат – су тасқыны мен төтенше жағдайлардың алдын алатын, елге қажетті инженерлік кадрларды даярлау. Сонымен қатар. шахтадағы қауіпсіздік, өртке қарсы шаралар, су тасқынын болдырмау бойынша да мамандықтар енгізіліп отыр. Өзге өңірден келген студенттерге жатақханалар және қосымша әскери білім алуға жағдай қарастылырған, – деді университеттің кәсіптік бағдар беру маманы Атабек Сайдоллаев.

Көрмеге ұстазымен келген 10-сынып оқушысы Аяулым Насретдиннің айтуынша, көрменің түлектерге берер пайдасы орасан. «Болашаққа таңдаған мамандығым — тарих пәнінің мұғалімі. Бүгінде Астанадағы Л.Гумилев атындағы Еуразия ұлттық университеті мен Алматыдағы Қазақ ұлттық қыздар педогогикалық университетіне түсуді көздеп отырмын» деді ол.