Байзақтағы жойқын жарылысқа кінәлі деп танылған екі сарбаз 9 жылдан бас бостандықтарынан айырылды

Жамбыл облысындағы әскери қоймадағы жарылысқа кінәлі деп танылған екі сарбаз тоғыз жылдан бас бостандықтарынан айырылды. Екі жауынгерге "бөтеннің мүлкін қасақана жою немесе бүлдіру" бабы бойынша айып тағылған болатын. Атышулы істе "қызметіне салғырт қарады" деп күдікке ілінген төрт офицер қылмыстық жауапкершіліктен босатылды. Сот залында айғайға басқан сарбаздардың туыстары үкіммен келіспеді. Олар жап-жас жігіттерге судья тым ауыр жаза кесті деп есептейді.
Дүйім жұртты дүр сілкіндірген Жамбылдағы жарылысқа қатысты атышулы істің ақыры нүктесі қойылды. Соттың соңғы отырысында ине шаншар жер болмады. Айыпталушы орындығында алты адам. "Қызметіне салғырт қарады" деп күдікке ілінген төрт офицер сот залынан босатылды. Екеуі ақталып шықса, екеуінің жаза мерзімі ескірген екен. Бірақ, мұндай бақыт екі сарбазға бұйырмады.
БӨРЛІБАЙ КАИПОВ, Шымкент гарнизонының әскери сотының судьясы:
– Тұранов Ерболат Ержанович ҚР ҚК 202 бабы 3-бөлігі,1-тармағымен көзделген қылмыстық құқықбұзушылық жасағаны үшін кінәлі деп танылсын. Оған 9 жыл мерзімге бас бостандығнан айыруға, жазасы тағайындалсын. Әшірбай Әсет Асылұлы ҚР ҚК 202 бабы 1-бөлігіне 1-тармақта көзделген қылмыстық құқықбұзушылық жасағаны үшін кінәлі деп танылсын. Оған 9 жыл мерзімде бас бостандығынан айыру жаза тағайындалсын.
Үкімді естіген сарбаздардың туыстары жылап-сықтап, айғайға басты. Ауыр жаза арқалаған жігіттер де өз-өздерін ұстай алмай, эмоцияға ерік берді.
Прокурор "бөтеннің мүлкін қасақана жою немесе бүлдіру" деген айып тағылған екі сарбазға 13 жыл бас бостандығынан айыруды сұраған болатын. Тергеудің мәліметінше, жауынгерлер оқ-дәрі сақталатын қоймаға от қойған. Бірақ, жігіттер кінәларын мойындаған жоқ. Балаларымызға жазықсыз жала жабылды деген туыстары да соттың шешімімен келіспейді.
ЕРКІН МҰРАТОВ, сотталушының туысы:
– 60 адамның ішінен кінәсіз екі жас жігіт қыршын болып тұр. Жас жігіттер олар. 20 жастағы балалар кетіп жатыр. Нағыз кінәлінің біреуі қамалған жоқ. Частьтің бастығы бар. Одан соң балаларды жұмысқа алып барған командирлер бар емес пе 4 адам қашып жүр қазір. Мына балаларды ремонтқа алып барған сол адамдар. Зданинені жөндеген. Шөбін жұлған.
Еске салайық, 2021 жылдың 26 тамызында Жамбыл облысындағы Байзақ ауданында әскери қойма жарылған еді. Апаттан 18 адам қаза тауып, жүздеген жан жараланған. Төтенше жағдайдан 24 миллиард теңге шығын келген. Енді бұл қаражатты темір торға тоғытылған екі сарбаз өтейді.
ӘМІРЕ САҒАДАТ, Шымкент қалалық адвокаттар алқасының адвокаты:
– Қылмыстық кодекстің талаптарына сай адамда сол қылмысты жасауға итермелейтін пиғыл, ниет болу керек. Бұл жерде ол пиғылдан, ол ниеттен қандай да бір артықшылық алу керек. Оларға бұл қандай артықшылық? Әскери қызметінің аяқталуына бір-ақ ай қалған. Уже үйіне қайтайын деп жатқан әскери қызметкер не керегі бар оларға.
Осылайша, бір айға жалғасқан соттың соңғы процесі айға-шумен аяқталды. Залды басына көтерген сотталушыларды полицейлер түрмеге күшпен әкетті.








Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал