ДЕПУТАТТАР БЮДЖЕТКЕ ӨЗГЕРІСТЕР ЕНГІЗДІ

Облыстық мәслихаттың кезектен тыс Х сессиясында бірнеше депутаттың өкілеттілігін тоқтату мәселесі қаралды. Сондай-ақ тұрақты комиссиялардың бірлескен отырысында 2024-2026 жылдарға арналған бюджетке өзгерістер енгізілді.

Депутаттар алдымен өзге қызметке ауысқан әріптестерінің өкілетілігін тоқтату мәселесін шұғыл түрде қарады. Бүгінге дейін түрлі деңгейдегі мәслихаттардан үш депутат өз өкілеттілігін тоқтату туралы талап арызын білдірсе, мұнан өзге тоғыз депутаттың да талабы қаралуда. Облыстық сайлау комиссиясының төрағасы орнын босатқан депуттарға қатысты сайлау заңдылықтарын түсіндірді. Заңға сәйкес, шығып қалған депутаттардың орындарына жылына 2 рет яғни, наурыз және қазан айларының соңғы жексенбісінде сайлау тағайындалады.

Мұнан соң кезектен тыс 11-ші сессияға ұсынылатын мәселелер тұрақты комиссиялардың бірлескен отырысында талқыға түсті. Облыстық экономика және қаржы басқармасының басшысы депутаттар тарапынан жолданған сұрақтарға жауап беріп, қолдау тапқан мәселелерге тоқталды.

Бірлескен комиссиялардың отырысында бірнеше депутат өз сауалдарының жауапсыз қалғанын ашық айтты. Депутат Дәулет Жұмбеков қытайлық инвесторлармен бірлесіп, Шиелі ауданында 3000 гектарға тамшылатып суару жобасын жүзеге асыруға қаржы қарастыру мәселесін көтерді.

Облыс әкімінің бірінші орынбасары Данияр Жаналинов бұл жобаға қатысты зерделеу жұмыстары жүргеннен кейін нақты шешім шығатынын жеткізді. Ал депутат Аида Әбибуллаева демографиялық өсімді ескере отырып, Тасбөгет, Сабалақ, Наурыз елді мекендері мен Астана, Саяхат мөлтек аудандарының балаларын сапалы қосымша біліммен қамту үшін шығармашылық сарайын салуды ұсынды. «Облыстың құрметті азаматы» атағын беру мәселесі бесінші ақпанда өтетін кезектен тыс сессияда қаралатын болып келісілді

Сайт - https://qyzylordatv.kz/ru/live
Facebook - https://www.facebook.com/qyzylordatv/
VK - https://vk.com/qyzylordatv
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/