Жетісулық журналистер жеңіс тұғырында

Журналистер күніне орай облыс әкімінің кубогі үшін шағын футболдан республикалық турнир өтті. Доп додасына Атырау, Ақтөбе, Түркістан, Қызылорда облыстары және Талдықорған, Шымкент қаласынан 8 команда қатысып, тартысты ойын өрнегін көрсетті.

Облыс әкімінің кубогіне арналған республикалық турнир Сыр жерінде осымен үшінші мәрте жалауын көтерді. Дәстүрге айналған доп додасының жыл өткен сайын маңызы артып келеді. Бұл жарысқа қатысушылардың пікірі. Биылғы турнирдің басты ерекшелігі алаңда 30 жастан асқан бұқаралық ақпарат құралдарының өкілдері ғана доп тепті.

Тағы бір айта кетерлігі, жарыс жолына биыл алғаш рет ақтөбелік әріптестер де қосылды. Осылайша спортқа жаны жақын журналистердің қатары тағы бір командамен толықты.

Турнирде 8 команда екі топқа бөлініп, өзара мықтыны анықтады. Бірінші топта талдықорғандық «Қарекет» командасы мен атыраулық жігіттер үздік атанса, қызылорданың қос командасы екінші топта көш бастады. Бірақ жартылай финалда «Ақмешіт» командасы «Атырау-Ақпараттан» пенальти сериясында жеңіліп қалды. Ал, жергілікті журналистерден құралған «Қаламгер» командасы талдықорғандық жігіттерге есе жіберіп қойды. Есеп 5:4.

Үшінші орын үшін болған ойында қызылордалық командалар кездесіп, нәтижесінде «Ақмешіт» жеңімпаз атанды. Ал, финалда жетісулық журналистер мұнайлы өлкенің жігіттерін айқын басымдықпен жеңіп, облыс әкімінің кубогын иеленді. Жарыс жеңімпаздарынан бөлек үздік ойын өрнегін көрсеткен футболшыларға «Үздік шабуылшы», «Үздік қақпашы» және «Үздік ойыншы» номинациялары табыс етілді.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/