Жылыой ауданындағы тасқын қаупі бар аумақтардатәуліктік кезекшілік ұйымдастырылды

Жылыой ауданында Жем өзені мен Құрсай каналын тереңдету жұмысы 90 пайызға аяқталды.Жоба бойынша түп тереңдету жұмысының ұзындығы 96 шақырымды құрайды. Құрсай өзегі – 46 шақырым, Жем өзені – 50 шақырым. Бүгінде Жемдегі жұмыс аяқталуға шақ. Құрсай каналының 28,7 шақырымы тереңдетіліп, тазартылды. Құр-Жемнің 6,6 шақырымындағы жұмыс аяқталды.

Аудан бойынша 65,3 шақырым болатын бөгеттерді нығайту жұмысы (Құлсары қаласы – 42,8 шақырым, Ақкиізтоғай ауылы – 5,3 шақырым, Тұрғызба ауылы – 10,8 шақырым, Шоқпартоғай ауылы – 6,4 шақырым) жоспарланған. Құлсары қаласында басталған су тасқынына қарсы 30,5 шақырым бөгеттерді қадағалау шаралары күнделікті жүргізілуде.

Одан бөлек ауданға қарасты Тұрғызба ауылы, Шоқпартоғай, Ақкиізтоғай ауылдары мен Құлсары қаласында (Аэропорт, Жадырасын ықшамаудандары мен Күмбез ата және Басшы ата қауымдары) бөгет көтеру жұмыстары жүріп жатыр.

Жалпы тасқыннан қорғау жұмыстарына арнайы 255 ауыр техника жұмылдырылуда.

Бүгінде Жылыой ауданында тасқынның алдын алу бойынша жедел штаб қызмет етеді. Олардың үйлестіруімен бөгеттердегі жағдайды бақылау үшін тәулік бойы жұмыс істейтін бекеттер қойылып, кезекшілік ұйымдастырылды. Күзетке аудан әкімдігі, аумақтық инспекция өкілдері және квазисектолық мекемелер жұмылдырылды. Қауіптің алдын алу бойынша атқарылып жатқан шараларға жергілікті атқарушы орган тарапынан 127 адам, Маңғыстау облысынан 55 адам мен 4 техника, Атырау мен Ақтөбе облыстарындағы әскери бөлімдерден 195 сарбаз бен екі техника, Атырау облыстық ПД-ден 18 қызметкер тартылды.

Жалпы ауданда төтенше жағдай болған кезде қажетті кұралдар қоры дайындалды. Атап айтқанда, 30 мотопомпа, 20 генератор, 102 мың қапшық, тонналық 800 қапшық, 600 данадан астам құрал-сайман (күрек, рация) алынды. Қосымша демеушілікпен мачта және бөгет басындағы бекеттерге 10 ағаш үй алынды. Сонымен қатар 15 тонна жанар-жағар май қоры дайын тұр. Зардап шеккендерді уақытша орналастыру үшін сыйымдылығы 700 адамға жуықтайтын 14 эвакуациялық пункт дайын. Қосымша 4 қонақ үйімен келісім-шартқа отыру жұмыстары жүргізілді (барлығы 300 орын).