ЖЫЛ БЕДЕРІНДЕГІ ТЕЛЕАРНА ТЫНЫСЫ

Расымен қоян жылы ел үшін елеулі оқиғаларға толы болды. Дүйім жұртты қуанышқа бөлеген жағымды жаңалық та, жанымызды жабырқатқан күрмеулі сәттері де аз емес. Ал, төріңіздегі көк жәшік дөңгелеген дүниені дүрбімен көрсеткендей көп жайды көз алдыңызға әкеледі. Осы орайда жаңалық жауынгерлерінің жыл бойғы жұмысын бір саралап өтпекпіз.

Телеарна – жылдар жылнамасын жаңғыртушы құрал. Әлемнің арғы қиырында жаңа болған жаңалықты үйіңізде отырып-ақ әп сәтте тамашалай аласыз. Бұл алып құрылымның үздіксіз тынысы. Әріптестеріміз биыл осы үдеден көріну үшін аянып қалған жоқ. Жаңалық жауынгерлері жыл бедерінде 3 мыңға жуық бейнематериал әзірледі. Сондай-ақ, аптап ыстыққа, ызғырық аязға қарамастан оқиға орнынан 200 рет тікелей эфирде ақпарат таратты.

Расымен, телеарна – ақпарат машинасы. Қазіргі жаңалық санаулы сәттен соң жариялауға жарамсыз. Сондықтан аймақтың басты арнасы медиа кеңістікте сылбырлыққа бой алдырмай келеді. Ел үшін елеулі оқиғалар мен саяси науқан кезінде жауапкершілік жүгі тіпті еселене түсері белгілі. Мәселен биыл Парламент Мәжілісінің депутаттарын сайлау науқаны болды. Аймақ ақпаратының жаршылары сол күні 100-ден астам бейнематериал әзірлеп, жұртшылыққа сәт сайын тың жаңалықтар жеткізіп отырды. Бағамдасақ бұл жүздеген маман жұмыс істейтін республикалық арналардың көрсеткішінен кем соқпайды.

Осылайша жыл бедерінде аймақ тынысы мен ел өмірінен мыңдаған ақпар айтылды. Тіпті алыс-жақын шет елдегі елеулі оқиғалар бірінші болып біздің арнадан көрсетілген кезі көп. Мұнымен қоса, спорт саңлақтары мен мәдениет майталмандарының эксклюзивті сұқбатын да жиі жарияладық. Әр бейнематериалдың бойында бірнеше маманның еңбегі бар. Жылжабар тұста соның тек бір парасына ғана тоқталдық. Мереке күндері де арна қызметкерлері көзі қарақты көрерменге қызықты бағдарламаларды ұсынуға әзір. Сондықтан, төл арнамыз төріңізде қосулы болсын!

Сайт - https://qyzylordatv.kz/ru/live
Facebook - https://www.facebook.com/qyzylordatv/
VK - https://vk.com/qyzylordatv
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/