Жұмысшылар наразылығымен Қызылорда – Жезқазған жолының құрылысы тоқтап тұр

Арнаға тіркел / Подпишись на канал: https://www.youtube.com/@UCqzhjBGNNwAIOH4u0YlJ6NA

Оңтүстік өңірлерді Сарыарқа және Теріскеймен жалғайтын Қызылорда – Жезқазған автожолының құрылысы тоқтап тұр. Оған басты себеп – жұмысшылар наразылығы. Сырдың бойынан Ұлытау облысына дейінгі аралыққа қиыршықтас тасыған ауыр жүк көлік жүргізушілері 3 айдан бері еңбекақы алмаған соң жұмысқа шықпай қойған. Келісімшартқа сәйкес мердігер мекеме 1 қаңтарға дейін қарызды жабуы тиіс болған. Алайда қытайлық компания өкілдері қыс бітіп, көктем шықса да аузын құр шөппен сүртіп отыр.
Күре жолдың Қызылорда облысына тиесілі 200-дей шақырымына құрылыс материалдарын жеткізумен айналысқан 200-ге жуық жүргізуші қазір жүк көліктерін қаңтарып қойған. «Қосалқы бөлшек пен жанармай алуға ақша қалмады. Несие де қос бүйректен қысып барады», - дейді жұмысшылар.
МҰХАМЕДЖАН АХМЕТОВ, КӨЛІК ЖҮРГІЗУШІСІ:
- 20 желтоқсанда ақшаны аударамыз деп уәде берді, кейін 5 қаңтар деді, 20 қаңтар, 20 ақпан деп кете берді. Енді беретін ақшамыз жоқ депті. Несиені несие алып жауып отырмыз. Әр камаздың артында 2-3 отбасы бар. Соның барлығын асырап отырған осы жүк көлігін айдаушылар.
СЕРІК ПЕРНЕШОВ - КӨЛІК ЖҮРГІЗУШІСІ:
- Бір өзіме қазір 3 млн теңгедей қарыз. Камаз автокөлігін жүргізу үшін қосалқы бөлшекке де ақша керек. Әр баллонның өзі 140-150 мың тг тұрады. Үйде асырап отырған бала-шағамыз бар. Киімі, тамағы бар дегендей. Жалпы осы қысылған жағдаймыз бар.
Жолды жаңартуға жауапты қытайлық компания өкілі жұмысшылардың 850 миллион теңге ақшасын төлемегенін растады. Әзірге «мәселені шешуге тырысамыз» дегеннен әрі аса алмай отыр.
ВАН Ю ЭВЕН, ШЕТЕЛДІК КОМПАНИЯНЫҢ ӨКІЛІ:
- Бізге Қытайдағы бас кеңседен ақша келуі керек болатын. Бірақ олар да бере алмай қалды. Сонымен кешігіп жатыр. Шыны керек, өзіміз де асыға күтіп отырмыз. Біз мұнда жобаны атқару үшін келдік. Мәселені ушықтырмай жуық арада қордаланған қарыздан құтылуға тырысып жатырмыз.
Жолды жаңғыртуға тапсырыс беруші «ҚазАвтожол» Ұлттық компаниясы қарыз жайлы тек өткен аптада ғана біліпті. Мамандардың айтуынша, шетелдік компания атқарған жұмыстарының құжаттарын тездетіп тапсырса, қосымша қаржы алып, қарыздарын жартылай болса да жаба алады. Екінші жоспар– сотқа жүгіну. Бірақ ол кезде қытайлық компания жұмысы толық тоқтатылып, берешек мүлдем қайтарылмауы мүмкін.
---------------------------------------------
Официальный сайт «Седьмого канала» https://tv7.kz/ru/
Instagram: https://www.instagram.com/tv7_kz/
TikTok: https://www.tiktok.com/@tv7_kz
Facebook: https://www.facebook.com/tv7kz/
Telegram: https://t.me/tv7_kaz

#Жаңалықтар #жаңалықтар2025 #жаңалықтаржетіншіарна #Жетіншіарна #седьмойканал #7канал