Исатай ауданында өнер мектебі мен спорт кешені ашылды

Исатай ауданында өнер мектебі мен спорт кешені ашылды

Бүгін Исатай ауданының Аққыстау ауылында 250 орындық өнер мектебі мен Х.Ерғалиев ауылында 250 орындық дене шынықтыру-сауықтыру кешені ел игілігіне берілді. Нысандардың ашылу салтанатына Атырау облысы әкімінің орынбасары Дарын Шамұратов қатысты,-деп хабарлайды облыс әкімінің баспасөз қызметі.

- Жаңадан ашылған заманауи нысандар ауданның тыныс тіршілігіне жаңа леп берді. Батыр бабамыздың атын алған өлке өнерден де, спорттан да кенде емес. Талай марғасқалардың қасиетіне қанық Нарын топырағы әлі талай дүлдүлді түлетеріне сенім кәміл. Есігін айқара ашқан өнер мектебі мен спорт кешені елім деген өрендерін тәрбиелейтін тәлім ордасына айналсын деп тілейміз. Өнер адамды көркемдікке баулиды, онымен сусындап өскен баланың болмысы да бөлек болады. Демек жаңа мектеп тәрбиенің де ордасы болады деген сөз. Қазақтың “Жұмыс қуып, ой түзе, Өнер қуып, бой түзе” деген мақалы осыған дәлел. Сондай-ақ жастарымызға спортпен кәсіби түрде кең әрі жарық, жайлы залда шұғылданудың мүмкіндігі туды. Жаңа кешенде жеңіс шыңына шығатын шәкірттер көп болып, еліміздің атын әлемге әйгілейтін чемпиондар тәрбиеленетін орда ретінде танылсын!-деді Д.Шамұратов.

Өнер мектебінде бірінші қабатында 183 орындық акт залы, әрқайсысы 8 адамдық музыка сыныбы, қолданбалы өнер, әрбірі 6 адамдық кескіндеме, сурет, мүсін шеберханалары орналасқан. Сондай-ақ 11 адамдық би сабағына арналған зал мен 16 орындық буфет бар.

Ал екінші қабатта оқу залы бар кітапхана бөлмелері қарастырылған. Ғимаратта 10 адамдық хор және оркестр сыныбы, әрқайсысы 8 орындық өнер тарихы және поэтикалық өнер кабинеті, 10 адамдық ансамбль сабағын өткізетін сынып бар. Бұдан бөлек сыртында түрлі іс-шараларды өткізу үшін 137 орынға арналған амфитеатр салынған. Нысан облыстық құрылыс басқармасының тапсырмасымен салынды. Мердігер мекеме - «Сала» ЖШС.

Ал дене шынықтыру-сауықтыру кешенін НСК"MBM CONSTRUCTION" ЖШС мердігер мекемесі салды. Мекемеде футбол, волейбол, баскетбол, қазақ күресі, бокс және дзюдо үйірмелері бар. Әр үйірме заманауи құрал-жабдықтармен жарақталған. Мұнда бір күнде 250 баланың спортпен шұғылдануына мүмкіндік бар. Сондай-ақ киім ауыстыру және санитарлық-тазалық бөлмелері, әкімшілік корпустары бар.

Исатай ауданында балалар мен жасөспірімдердің спортпен шұғылдануы үшін 3 спорттық мекемеге қарасты 5 спорт кешені жұмыс істейді. Наурызда Нарын және Зинеден ауылдарында жаңа спорт кешендерінің құрылысы басталады. Қазіргі уақытта 2000-ға жуық бала спортпен тұрақты түрде шұғылданады.