Көгалдандыру жұмыстары қатаң бақылауда

Қызылорданы көркейтіп, көгалдандыруға биыл айрықша ден қойылып отыр. Шахар аумағына 8 мың түп ағаш егу жұмыстары басталып та кетті. Ал, көгалдандыру мәселесінде қаланы суару жүйесімен қамтамасыз ету – өзекті мәселенің бірі. Сондықтан қала әкімі Серік Қожаниязов облыс орталығын аралап, аяқсу мәселесі қалай шешіліп жатқанын өз көзімен көрді. Су тартуға арналған насостық құрылғылардың жұмысын тексерді.

Бұл «Жібек жолы» каналы. Мына су қондырғысы арқылы Назарбаев пен Астана даңғылы, Сырдария мөлтек ауданы, сондай-ақ 6 шақырымдық каналдар мен арық жүйелеріне су жіберіліп жатыр.

СЕРІК ҚОЖАНИЯЗОВ – ҚАЛА ӘКІМІ //Жыл басында уәде еткендей сәуір айының басында қалаға аяқ су береміз дегенбіз. Бұған дейін бірнеше мекеме конкурсқа қатысып, айтысып,соттасып жүріп, айдың аяғында, кейбір кезде июньге дейін кеткен кездері болды. Биыл енді сәуірдің 4-нен бастап су бердік. Қазір қалада 7 осындай каналдар бар. Сондай-ақ, 400 км жуық арық жүйлері бар. Солардың бітелгені бар, тазасы бар соларды қазір жасап жатырмыз. Былтыр да егілген талдар, биыл да егілген талдардың бәрі сумен қамтылатын болады.//

Биыл «Тәуелсіздік» даңғылы бойындағы 2 гектар жер тазартылып, үш тұқым бағы дайындалуда. Қазір бұл аумаққа 50 мың түп қаламша отырғызылған. Алдағы уақытта саябақтар мен аллеяларға егілетін тал көшеттері осы тұқым бағынан алынбақ. Ал, «Сыр ана» монументі жанындағы су қондырғысы биыл қайта жаңғыртылып, Сұлтан Бейбарыс көшесі мен «Береке» саяжайы аяқ сумен қамтылды.

СЕРІК ҚОЖАНИЯЗОВ – ҚАЛА ӘКІМІ //Қазір арғы бетте скважина бар. Жақында «Сыр ана» монументі жанына ағаштар еккенбіз. Соған су береміз. Ал, мына су қондырғысы арқылы аяқ су «Арайға» сосын әрі қарай кете береді.//

Тұрғындардың өтінішіне сәйкес, көптен бері аяқ су бармаған «Ақмешіт» мөлтек ауданына да биыл су келіп, арық жүйелері тазартылып жатыр. Бұл өз кезегінде тұрғындардың ауыз суды үнемдеуіне және қаланың жасыл желекке айналуына сеп болмақ, дейді қала әкімі.

СЕРІК ҚОЖАНИЯЗОВ – ҚАЛА ӘКІМІ // Тұрғындарға су жеткізіп берсек бұрыннан егілген талдарды күтіп-баптауға сеп болмақ. Алдағы уақытта көпқабатты тұрғын үй аулаларынан газондар не аллеялар өсіріп қалуымыз мүмкін. Соған үлкен мүмкіндік бұл.//

Бүгінде қала аумағына Сыр табиғатына төзімді 8 мың тал шыбықтары отырғызылуда. Оны күтіп-баптау «Жасыл Қызылорда» коммуналдық мемлекеттік мекемесіне жүктелген. Сонымен қатар, қала ішіне су жеткізу үшін Сырдария өзені және каналдар арқылы 19 жерден насос қондырғылары орнатылған.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/