Көлік министрлігі ақылы жолдарды көбейтпек

Арнаға тіркел / Подпишись на канал: https://www.youtube.com/@UCqzhjBGNNwAIOH4u0YlJ6NA

Көктемде Қарағанды – Жезқазған және Ақтөбе – Ұлғайсын жолдарының құрылысы басталады. Сарыағаш қаласын айналып өтетін жолды салуға жұмысшылар сәуір айынан кешікпей кірісуі керек. Үкімет басшысы көлік министріне осыны тапсырды. Олжас Бектенов салынып жатқан жолдың сапасы мен мерзімінен кешікпей берілуін қадағалауды әкімдерге жүктеді.
ГҮЛВИРА СЕЙТЕНОВА, ТІЛШІ:
- Көлік министрінің жолға қатысты жоспары көп. Марат Қарабаев биыл 13 мың шақырым жолды жөндеп бермек. Ең ірісі Ақтөбе – Ұлғайсын, Қарағанды – Жезқазған, Атырау – Доссор, Сарыағаш қаласының айналма жолы кеңейтіліп, төрт жолақты болады. Ал бірнеше жыл бұрын басталып, құрылысы әлі күнге сағызша созылып жатқан Қалбатау – Майқапшағай, Күрті – Қонаев, Қызылорда – Жезқазған және Ұзынағаш – Отар жолы биыл да бітпейді. Есесіне, жарты ғасырдан бері асфальт көрмеген жолдарға техниканың табаны тиеді.
МАРАТ ҚАРАБАЕВ, КӨЛІК МИНИСТРІ:
- Солтүстік Қазақстан, Ақмола және Абай облыстарында ауқымды жұмыстар жоспарланған. Жөндеу жүргізілмегеніне 30 жылдан 50 жылға дейін болған жолдар: Петропавл – Жезқазған, Қандыағаш – Шалқар, Жаңаөзен – Түрікменстан шекарасы, Қарағанды – Аягөз – Боғас толық жөндеуден өтеді.
ГҮЛВИРА СЕЙТЕНОВА, ТІЛШІ:
- Кабмин басшысы жергілікті жолдарға баса мән беру керек екенін айтты. Облыстық және аудандық жолдарды жөндеуге республикалық бюджеттен қомақты қаражат бөлінгенімен, кей өңірде ақша жетпейді екен. Батыс Қазақстан, Солтүстік Қазақстан, Абай облыстарында жол сапасына наразы тұрғындар жаппай шағымданып жатыр. Олжас Бектенов Көлік министрі мен әкімдерге аймақтағы жолдың жағдайын ұдайы бақылап отыруды, ақау болса, уақытында қалпына келтіруді тапсырды. Қажет материал қымбаттап кетпей тұрғанда жол құрылысына дайындықты ерте бастан жүргізу керек деп ескертті.
ОЛЖАС БЕКТЕНОВ, ҚР ПРЕМЬЕР-МИНИСТРІ:
- Қарағанды – Жезқазған, Ақтөбе – Ұлғайсын және Сарыағаш қаласы айналма жолын салу жобаларының дайындық деңгейі жоғары. Жалпы қаржыландыру мәселесі де шешімін тапты. Бірақ әкімшілік рәсімдер созылып кетті. Көлік министрлігіне осы жылдың сәуір айынан бастап құрылыс жұмыстарына кірісуді тапсырамын. Өңірлерде жол инфрақұрылымын жаңғырту жұмыстарында құрылыс технологияларын сақтамау және мерзімдерді кешіктіру байқалып отыр. Әкімдер бұл мәселелерді бақылауға алуға тиіс.
ГҮЛВИРА СЕЙТЕНОВА, ТІЛШІ:
- Жол құрылысына бюджеттен ақша алуды азайту үшін Көлік министрлігі ел бойынша ақылы жолдарды көбейтіп жатыр. Былтыр ақылы жолдан қазынаға 48 млрд теңге түскен. Биыл қосымша 4 мың шақырым жол ақылы болмақ. «Бұдан кірісіміз 60 млрд теңгеге дейін ұлғаяды», - дейді Марат Қарабаев. Келесі жылы бұл санды 100 млрд теңгеге жеткізбек ойы бар. Ал жолдарды қашықтан басқару үшін «E-Joldar» бірыңғай цифрлық платформасы әзірленіп жатыр. Онда елдің барлық жолы туралы ақпарат жиналып, бүкіл процесс автоматтандырылады. Премьер-министр платформаны жыл соңына дейін пилот режимде іске қосуды тапсырды. «2027 жылға қарай елдегі республикалық маңызы бар жолдарда интернет пайда болады», - деп уәде етті цифрлық даму министрі.
---------------------------------------------
Официальный сайт «Седьмого канала» https://tv7.kz/ru/
Instagram: https://www.instagram.com/tv7_kz/
TikTok: https://www.tiktok.com/@tv7_kz
Facebook: https://www.facebook.com/tv7kz/
Telegram: https://t.me/tv7_kaz

#Жаңалықтар #жаңалықтар2025 #жаңалықтаржетіншіарна #Жетіншіарна #седьмойканал #7канал