Көлік министрі жол жөндеуге немқұрайлы қарайтын кейбір өңір әкімдерін сынға алды

Қазақстанда жолдары нашар бола тұра, жол құрылысына қаражат бөлмейтін облыстар бар. Мұндай деректі көлік министрі Марат Қарабаевтың өзі айтып, жол жөндеуге немқұрайлы қарайтын кейбір өңір әкімдерін сын садағына алды. Себебі, өмір сапасын жақсартуға ықпал ететін маңызды мәселеге келгенде әкім-қаралар жергілікті бюджеттен қаржы беруге құлықсыз екен. Мәселен, биыл қазынадан осы мақсатқа 384 миллиард теңге қарастырылған. Оның тек 81 миллиард теңгесі демек, 21 пайызы ғана өңір бюджеті есебінен бөлініпті. Сорақысы, жолдары ең нашар өңірлердің әкімдігі құрылысқа мүлдем қаражат қарастырмаған.
Министр Марат Қарабаев бірқатар өңірдің басшылығын сынға алып отыр. Пікірінше, кейбір облыс әкімдері өлке тұрғындары үшін жағдай жасауға құлықсыз. Себебі, жолдардың жай-күйін біле тұра, не ақша бөлгісі келмейді, не бөлуге қауқарсыз. Ал, бұл тізімде Батыс және Шығыс Қазақстан, Қостанай, Абай, Маңғыстау мен Атырау облыстары бар. Мәселен, кейінгісінде жылдар бойы жібі түзу жолға жарымай отырған елдімекендер көп. Соның бірі – Песок – 1 саяжайы. Қазір мұндағы мұқым ел күн жауса, балақтан батпақ кешуге мәжбүр. Болмаса, балшыққа батқан көлігін сүйреп әуре. Әсіресе, ауырған кісіге қиын дейді ауылдағы ағайын. Өйткені, күткен жедел жәрдемі елдімекенге кіре алмайды, бар көлігі шыға алмайды.
ШАРИПА ҚҰРМАНОВА, Атырау облысының тұрғыны:
– Жолымыз мынау, Өзіміз жылда ақша төлеп, жерге асфальттан қалған қалдықтарды төгеміз.
АҚМАРАЛ ҒИЛАШ, Атырау облысының тұрғыны:
– Өте қатты саз балшық. Бізге автобус жүргізушілері бұл жердің балшық болғасын тоқтамай асып кетеді. Алдымыз қыс мезгілі, ұл-қыздарымыз үшін қатты алаңдаймыз. Тіпті тоқтамаса қай жерден түскенінде білмейміз.
Рас, қазір қала маңындағы мұндай көрініске көп кісі таң қала бермейді. Әрі, соңғы жылдары жол құрылысы қарқын алғанын да жоққа шығара алмаймыз, Алайда, сол салынған жолдың сапасы сын көтермейтіні тағы рас. Бірде мердігер төсеген асфальтті жел көтеріп, бірде үгітіліп кетіп жатады. Ал, бұл жағдайға жергілікті халықтан басқаның басы ауырмайтын секілді еді. Енді бұл олқылықтардың орнын толтыру үшін тәртіп өзгеретін сияқты. Себебі, министр жол сапасын арттыруға бағытталған төрт ережені таныстырды. Алғашқысы, «Ұлттық сапа орталығы» республикалық жолдардың құрылысын ғана қадағалаумен шектелмейді. Демек, бұдан былай жергілікті яғни, ауылішілік жолдарға да сараптама жасайды. Екіншісі, тапсырыс беруші жөнделген жолды қабылдап аларда «Ұлттық сапа орталығы» анықтаған кем-кетік жойылған соң ғана қабылдайды.
МАРАТ ҚАРАБАЕВ, ҚР Көлік министрі:
– Үшінші, «EPCM-келісімшарт» деген ұғымды енгізіп жатырмыз. Ол жолды тек қана салып қоюға ғана емес, алдағы уақытта жолды өзі күтіп ұстауға және соған жолға белгілі бір он жылдан астам мерзімде жауап беру қағидасы енгізіліп жатыр. Ал, төртінші, жолда ақаулықтар табылса, тек қана мердігер компания емес, мына авторлық-техникалық қадағалауда болған компаниялар да, соларда қос жауапты болып табылады.
Бастысы, ведомство басшысы әкімдер де жолдардың нормативтік жағдайын көтеруге қосымша қаржы қарастыруы қажет деп отыр. Айта кету керек, қазір ел аумағында 10 700 шақырым жолға құрылыс-монтаж жұмыстары жүргізіліп жатыр. Оның 6500 шақырымы республикалық ал, 4500 шақырымы жергілікті маңыздағы жол. Міне, осы жұмыстардың нәтижесінде республикалық жолдардың 92, жергілікті желінің 87 пайызы жақсы не қанағаттанарлық деңгейге жеткізілмек.









Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал