"Менің бауырым" жобасы басталды

Елімізде Оқу-ағарту министрлігінің бастамасымен «Менің бауырым» атты студенттік еріктілер жобасы қолға алынған. Мақсаты - жеткіншектердің құқықтарын қорғап, қауіпсіздігін қамтамасыз ету. Аталған жоба аясында облыстағы жоғары оқу орындарының студенттері мектеп оқушыларымен тығыз байланыста болып, оларға жан-жақты қолдау көрсетпекші.

Мектеп жасындағы балалар көбіне ішкі сырын ата-анасына немесе ұстазына ақтарылып айта қоймайды. Ал қатарластарымен еркін сырласады, әңгіме-дүкен құрады. Сондықтан еріктілер оқушылармен етене жұмыс істеп, түрлі жобаларды жүзеге асырмақшы.

АСҚАРБЕК ЕСЖАНОВ - ОБЛЫСТЫҚ БІЛІМ БАСҚАРМАСЫНЫҢ БАСШЫСЫ «Менің бауырым жобасы ерікті студенттердің мектепке келіп, өздерінің іні-қарындастарына өмірлік тәжірибелерімен және өздерінің әдіс тәсілдерімен бөлісетін болады. Әрине, олардың тілі бір бірімен жатық, жастың тілін жас түсінеді».

Жобаны ұйымдастырушы - «Өркен» балалардың әл-ауқатын арттыру Ұлттық ғылыми-практикалық институты. Семинар барысында институт өкілдері мұғалімдер мен студенттерге жоба туралы жан-жақты ақпарат беріп, түсіндірме жұмыстарын жүргізді.

ГҮЛНАР БАЛҒАБАЕВА - «ӨРКЕН» БАЛАЛАРДЫҢ ӘЛ-АУҚАТЫН АРТТЫРУ ҰЛТТЫҚ ҒЫЛЫМИ-ПРАКТИКАЛЫҚ ИНСТИТУТЫНЫҢ ВИЦЕ-ПРЕЗИДЕНТІ «Балалармен қалай сөйлесу керек екенін, қалай тіл табысу керек екенін сондай жаңаша әдіс тәсілдерді көрсетіп отырмыз. Студенттер қызығушылық танытып, жұмыс жасауға атсалысайын деп отыр. Республикада 20 аймаққа ендіреміз. Қазіргі жағдайда алты өңірге енгіздік. Жоба үш жылға бағытталған».

НҰРАЙ САҒЫНАЙҚЫЗЫ - ЕРІКТІ «Мектеп оқушыларымен осы уақытқа дейін үйренген тәжірибелерімізбен бөлісетін боламыз. Әр түрлі қызықты ойындар, тренингтер ұйымдастырамыз. Бізге бұл үлкен тәжірибе».

«Менің бауырым» еріктілер жобасына Қорқыт ата атындағы Қызылорда университетінен 600-ге жуық студент ат салыспақ. Олар қаладағы білім ошақтарында буллингтің алдын алу, салауатты өмір салтын дәріптеу, мәдени-спорттық шараларға тарту бағытында түрлі іс-шаралар өткізуді жоспарлап отыр.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/