Мәйіті кәріз құдығынан табылған 4 жасар бала жер қойнына тапсырылды

Түркістанда кәріз құдығынан табылған 4 жасар Айбар Бақытты бүгін туыстары жер қойнына тапсырды. Бірінші желтоқсан күні далаға шығып кеткен бала кеше кәріз құдығынан табылған болатын. Бүлдіршінді іздеуге ағайын-туыстан бөлек полицейлер мен еріктілер де жұмылдырылған еді. Қайғылы оқиғадан кейін балалар омбудсмені Динара Зәкиева да үнсіз қалмады. Оның айтуынша, кәріз құдығын бақылайтын мамандарды жауапқа тарту керек.
Түркістанда екі кештің ортасында ойынға шығып кеткен баласынан көз жазып қалған Айбардың анасының бұл үміті үзілмеген сәті. Бірінші желтоқсан күні іздеу жарияланған бүлдіршін анасының құшағына аман оралмады. Үш күн бойы елдің бәрі жұмыла іздеген балақайдың мәйіті көрші үйдің кәрізінен табылды.
БАҒЛАНБЕК АЙТБАЕВ, Түркістан облысы полиция департаменті бастығының орынбасары:
– 4 жасар баланың денесі көрші үйдің жанындағы кәріз құдығынан табылды. Баланың денесін медицина сарапшылары тексерді. Ал, мәйітінде зорлық-зомбылық пен қандай да өлім белгілері табылмады.
Полицияның мәліметінше, бір қарағанда кәрізден ештеңе байқалмаған. Тек екінші рет ішіндегі қалдықты тазалау кезінде бүлдіршіннің мәйітін көрген. Өкінішке қарай, бұл еліміздегі балалардың кәрізге түсіп ажал құшқан алғашқы жағдайы емес.
ДИНАРА ЗӘКИЕВА, ҚР Бала құқықтары жөніндегі уәкіл:
– Тексеру жүргізіп, осы орындар бойынша жауапкершілікті алған мамандарды жауапқа тарту қажет деп санаймын. Олар инфрақұрылымның қауіпсіздігін қамтамасыз етпегендіктен балалардың өліміне әкеп соғып отыр. Сондай-ақ осы салаға жауапты жергілікті атқарушы органдардың басшылары мен аудан әкімдерін жауапкершілікке тарту керек.
Алайда, әкімдік өкілдері қайғылы жағдайға қатысымыз жоқ деп ат тондарын ала қашты. Жеке үйлердегі кәрізді бақылау міндетіміз емес деген шенеуніктер бұл ауданға мемлекеттік құбыр енді тартылып жатқанын жеткізді.
СМАДИЯР САБЫРОВ, Түркістан қаласы инфрақұрылым және коммуникациялар бөлімі басшысының орынбасары:
– Бұл септик тұрғын үйдің өзінің жеке мүлкі болып табылады. Және де әкімдіктің немесе әкімдікке қарасты мекемелердің орталық кәріз жүйесі болып табылмайды.
Кішкентай баланың денесін туыстары бүгін жер қойнына тапсырды. Полиция әзірге бұл іске қатысты тергеп-тексеру жұмыстарын жалғастыруда.






Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал