Облыста 150 әйел қатысқан «Ауыл әйелдері форумына» өтті

Облыста 150 әйел қатысқан «Ауыл әйелдері форумына» өттті

Атырау облысы «Шапағат ҮЕҰ» ҚБ ұйымдастыруымен Қазақстанның кәсіпкер әйелдер қауымдастығы ауыл әйелдерін қолдау, оларды кәсіпкерлікке баулу және әрі қарай жұмысын жандандыру бағытында «Ауыл әйелдері форумын» өткізді. Жиынға облыстың түкпір-түкпірінен 150-дей әйел, жергілікті билік өкілдері, кәсіпкерлер және үкіметтік емес ұйымдардың мүшелері қаттысты, - деп хабарлайды Өңірлік коммуникациялар қызметі

Шара тек кәсіпкерлерге емес, кәсібін бастауды көздеген жастар мен ауыл әйелдеріне де арналған. Форум барысында қатысушылар кәсіпкерлікке қатысты маңызды мәліметтер алып, мемлекеттік бағдарламалар туралы кеңеске жүгінді.

- Ауыл әйелдері тұрмыстық шаруашылықпен айналысып, сүт сауып, нан пісіріп, өз өнімдерін сатумен айналысады. Алайда олардың көпшілігі жеке кәсіпкер ретінде тіркелмеген және кәсіпкерлерге арналған мемлекеттік қолдау шаралары туралы толық ақпаратқа ие емес. Соған байланысты осындай форум ұйымдастырдық. Бұл – ауыл әйелдерінің экономикалық әлеуетін арттырып, олардың өз ісін дамытуына жол ашатын маңызды қадам, - дейді Атырау облысы бойынша «Шапағат ҮЕҰ» ҚБ президенті Аягүл Баямирова.

Облыс әкімдігінің қолдауымен әйелдердің қоғамдық белсенділігін арттыру және көшбасшылық қабілеттерін дамыту мақсатында «Томирис» ақпараттық білім беру жобасы іске асырылуда. Бұл жоба аясында 2024 жылы 50 әйел өздерінің әлеуметтік және кәсіби белсенділігін дамыту бойынша арнайы оқыту сабақтарынан өтті.

- Әйел кәсіпкерлерін қолдау мақсатында мемлекет тарапынан бірқатар қаржылық жеңілдік қарастырылған. Атап айтқанда, кәсіпкерлердің екінші деңгейлі банктерден алған несиелерінің пайыздық мөлшерлемесін субсидиялау және банк талап еткен кепілдік жеткіліксіз болған жағдайда оны ішінара өтеу мүмкіндігі қарастырылған. Қазіргі уақытта бұл қолдау «Даму» қоры арқылы жүзеге асырылып жатқан бірыңғай кешенді бағдарлама аясында іске асырылуда. 2024 жылы Атырау облысы бойынша 915 кәсіпкердің несиесіне 46,6 млрд теңге көлеміндегі пайыздық мөлшерлемені субсидиялау жүргізілді. Сонымен қатар 1,2 млрд теңгелік несие кепілдігі ұсынылды. Бұл қолдауға ие болған кәсіпкерлердің 50%-ы, яғни, 456-сы – әйелдер, - дейді «Даму» кәсіпкерлікті дамыту қорының АОФ директоры Ернар Жұмағалиев .

Іс-шара аясында ауыл әйелдерінің ұлттық дәстүр мен заманауи шығармашылықты ұштастырған қолөнер бұйымдарының көрмесі ұйымдастырылды.