Оң жағалауындағы коммуналдық апат. 2-бөлім

10 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель Jun 19, 2025

Теміртаудың Оң жағалауында су мәселесінің жылдар бойы шешілмеуіне байланысты түсірілген сюжеттен кейін, «Теміртау жаңалықтары» редакциясы бұл аудандағы су құбырларының жұмысын қамтамасыз ететін «АКВА-Трейдинг» ЖШС-на ресми сұрау жолдаған болатын. Редакцияға жауап келіп түсті — компания қазіргі жағдайға қатысты түсініктеме берді.
«АКВА-Трейдинг» ЖШС-ның ресми хаты бойынша, 2025 жылғы 9 маусым күні Нагорная көшесінің тұрғындарынан салқын судың жоқтығы жөнінде диспетчерлік қызметке өтініш түскен. Учаскені тексеру барысында құбыр жарылысы тіркелген. Алайда компанияның мәліметінше, өтініш түскеннен кейін үш сағат ішінде су беру қайта қалпына келтірілген. Соған қарамастан, тұрғындардвң айтуынша, сол күні су мүлде болмаған, ал кейде мұндай үзілістер бірнеше күнге созылады.
Сондай-ақ, компания өз хатында апаттық бригадалардың тек ресми өтініштерден кейін ғана шығатынын нақтылайды. Әлеуметтік желілердегі шағымдар немесе ауызша хабарламалар негізінде техникалық қызмет көрсетілмейді.
Неге компания өкілдері тұрғындармен кездесуге келмейді деген сұраққа «АКВА-Трейдинг» басшылығы апатты жағдайларды жою және халықпен кездесу олардың қызметтік міндетіне кірмейтінін жауап ретінде көрсеткен. Компания барлық жөндеу жұмыстарын өз күштерімен, үшінші тарапты тартпай-ақ жүргізетінін мәлімдейді.
Дегенмен, ресми жауапта келтірілген статистика атқарылған жұмыстардың көлемінің ауқымды екенін көрсетеді: жыл басынан бері Прокатная, Энергетиков, Восточная, Сталеваров және басқа да көшелерде ондаған жөндеу және ауыстыру жұмыстары жүргізілген.
Хатта ерекше атап өтілген жайт — қайта жаңғырту жобасы аясында салынған жаңа су құбырлары «АКВА-Трейдинг» ЖШС-ның балансына әлі берілмеген.
Олар әзірге басқа мердігер компаниялардың қарамағында, соның ішінде кепілдік міндеттемелерін атқарып отырған «BERTYS CONSTRUCTION» компаниясы да бар. Ал тұрғындар бұл техникалық ерекшеліктерден хабарсыз.
Осылайша, ресми жауаптар мен жүргізілген жөндеулерге қарамастан, адамдар әлі де сусыз өмір сүруде. Теміртаудың Оң жағалауындағы су жүйесі — мердігерлер, кепілдік мерзімдер мен жауапкершіліктің жоқтығынан тұратын шырмалған түйінге айналған.
«Теміртау жаңалықтары» редакциясы бұл жағдайдың шешілуіне ресми жауап соңғы нүкте емес, нақты өзгерістерге бастар алғашқы қадам болады деп үміттенеді және мәселенің барысын бақылауда ұстайтын болады.