Сарайшықтағы археологиялық қазбалар бойынша баспасөз конференциясы өтті

2 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель Jun 26, 2025

2025 жылғы 26 маусымда ортағасырлық Сарайшық қалашығындағы археологиялық қазба жұмыстарының барысымен таныстыру мақсатында бұқаралық ақпарат құралдары өкілдеріне арналған арнайы баспасөз конференциясы өтті.

Қазба жұмыстары Атырау облысы әкімдігінің және облыстық Мәдениет және тілдерді дамыту басқармасының қолдауымен жүргізілуде.

Аталған археологиялық жобаны 2025 жылғы 10 маусымда бастаған Атырау облыстық тарихи-өлкетану музейінің ғылыми-зерттеу тобы көне Сарайшықтың тарихи-мәдени мұрасын жан-жақты зерттеуге бағытталған маңызды жұмыстар атқаруда. Жалпы көлемі 15х15 метрді құрайтын қазба алаңында мәдени қабаттардың төменгі деңгейіне дейін зерттеу жүргізіліп, көне ғимараттар мен көрханалардың қалдықтары аршылып, ғылыми тұрғыдан зерделенуде.

Қазба барысында ортағасырлық кезеңге тән қыш бұйымдар мен ыдыстар, су құбырлары, мұржа сынықтары, сүйектен жасалған әшекейлер, сондай-ақ Алтын Орда дәуіріне жататын монеталар мен өзге де құнды тарихи жәдігерлер табылуда. Бұдан бөлек, шаруашылық мақсаттағы нысандардың іздері, су арналары және қыш кірпішпен қаланған құрылыс нысандары анықталуда.

Баспасөз конференциясы барысында Атырау облыстық тарихи-өлкетану музейінің директоры М.Кипиев биылғы археологиялық маусым аясында шамамен 500 шаршы метр аумақта қазба-зерттеу жұмыстары жүргізілетінін атап өтті. Сонымен қатар, алғаш рет қызыл кірпішпен ерекше тәсілде қаланған жерлеу-ғұрыптық құрылым табылғанын және бұл нысанға ғылыми талдау жасалып жатқанын мәлімдеді.

Бұдан бөлек музей басшысы Атырау облысы әкімдігінің қолдауымен Ортағасырлық Ақтөбе-Лаэти қалашығын ашық аспан астындағы музейге айналдыру жобасының қолға алынғанын жеткізді. Сондай-ақ, археологиялық бағыттағы халықаралық ынтымақтастықты кеңейту мақсатында Әлкей Марғұлан атындағы Археология институты, А.Халиков атындағы Татарстан Археология институты және Атырау облыстық тарихи-өлкетану музейі арасында үшжақты меморандум жасалып, 2026 жылы бірлескен археологиялық экспедициялар өткізу жоспарланып отырғанын хабарлады.

Қазба жұмыстарының ғылыми жетекшісі, тарих ғылымдарының кандидаты Марат Қасеновтың айтуынша, биылғы маусымдағы ерекше олжалардың қатарында алғаш рет табылған ірі тұғырдың сынығы, гипстен жасалған кәріз құбырлары, араб жазуы бар күміс жүзік сынығы және сүйектен ойылып жасалған әйел шаш түйреуіші бар. Бұған қоса, құрылымы күрделі, сатылы және мұржасы бар XV–XIV ғасырларға тиесілі жерлеу орны табылып, зерттеу жұмыстары басталған.

Айта кетейік, археологиялық маусым 2025 жылғы 10 шілдеге дейін жалғасады.