Студенттер әскери өмірмен танысты

Мәншүк Мәметова атындағы Қызылорда педагогикалық жоғары колледжінің студенттері шынайы әскери өмірмен танысты. Ұлттық қауіпсіздік комитеті шекара қызметінің «Наурыз» далалық оқу-жаттығу орталығында өткен жиында студенттер екі күн бойы сап түзеген сарбаздармен қатар жүрді. Жастарды жігерге баулыған бастама турасында тілшіміз тарқатады.

Шыны керек, бұрын жігіттер жағы әскерге бармағанды ар санайтын. Ал қазір керісінше, Отан алдындағы борышын өтеуге енжар қарайтын жастар көбейді. Ел шетін жау баспасын, деп найзаға үкі таққан жұрттың жұқанасы жұқармауы шарт. Батыр қыз атындағы оқу ошағы ұйытқы болған бастаманың негізгі мақсаты осы. Далалық жиында колледждің 100-ге жуық бірінші курс студенттері сап түзеген сарбаздар міндетін мүлтіксіз орындауға тырысты.

Жастар арасында әскери-патриоттық рухты қалыптастырған жиын екі күнге созылды. Студенттер шекара шебін қас қақпай күзетудің жауапкершілігін сезініп, әскери өмірдің қызығына да қанықты. Ал, ымырт үйірілген шақтан бастап жалындаған алау маңына жиылып, әскери сала ардагерлері мен аға буынның тағылымын тыңдады.

Қазақ «Отың өшпесін, шырағың сөнбесін» деп жылылықтың маңызын бағдарлаған халық. Содан болар түн кірпігін ілгендегі рухани шара шынайылықпен өрбіді. Бұл кеште көлгірсіп, көсемсу болған жоқ. Ағалар өмір сабағын айтып, патриоттық бағытта әндер шырқады. Жастар жағы да белсенді. Айта кетерлігі бұл алғаш рет ұйымдастырылған бастама. Енді тұрақты түрде өткізіп тұру жоспарланып отыр.

Бағамдасақ, осы бір кештен-ақ жастар рухани әсерге бөленіп, әскери өмірге қызыға түскендері анық.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/