Талғарда 1 банка сыра үшін жасөспірімді өлтіргендер жазадан құтылып кетпей ме? Талғардағы трагедия

4 қазан күні Талғар қаласында болған қайғылы жағдай қоғамда үлкен резонанс тудырды. Бір топ адам бір банка сыра үшін 16 жастағы Шерзат Болатты пышақтап өлтірді. Екі ер адам Шерзаттың отбасына тиесілі дүкенге келіп, сыра алып, ақшасын төлемеген. Осы кезде дүкен қожайыны мен әлгі жігіттер сөзге келіп қалады. Бұл кикілжіңге дүкен иесінің ұлы – Шерзат араласады. Дүкеннен шыққан бойда екі адам сыбайластарына қоңырау шалып, көмекке шақырады. Шерзаттың туыстарының айтуынша, бас-аяғы 13 адам келіп жеткен, бәрінің қолында қаруы болған. Оның ішінде екі қыз бар. Төбелес барысында Шерзаттың жүрегі мен өкпесіне пышақ сұғып алған. Одан кейін қаскөйлер анасының көз алдында Шерзатқа жабылып басынан тепкен. Бұл төбелесте Шерзаттан бөлек әкесінің інісі де жарақат алды. Баланың туыстары жедел жәрдем мен полиция жетіп болмады деп шағымданып отыр. Шерзат Болатты әкесі өз қолымен ауруханаға апарған. Бірақ дәрігерлер жасөспірімнің өмірін құтқара алмады.
Кісі өлтіру фактісі бойынша полиция қылмыстық іс қозғады. Оқиғаға қатысқан жеті адам ұсталып, 2 ай мерзімге уақытша ұстау изоляторына қамалды. Кейін күдіктілер Қонаев қаласына жеткізілді. Полиция мәліметіне сәйкес, қылмыстық іс Талғар қаласынан Қонаевтағы облыстық тергеу басқармасына берілген.
Ішкі істер министрі Ержан Сәденов істі жеке бақылауына алды. Тергеу жұмыстары жалғасып жатыр.
Оқиғаға қатысы бар бірнеше адам жауапкершіліктен құтылып кетуі мүмкін деген Талғар тұрғындары наразалыққа шықты. Прокуратура мәлімдеме жасап, кінәлілер тиісті жазаға міндетті түрде тартылады деп сендірді. Ал Полиция департаменті камераға түсіп қалған Талғардағы жанжалдың бейнежазбалары жойылды деген ақпаратты жоққа шығарды.
Кісі қолынан қаза тапқан жас жігіттің ата-анасы марқұм Салтанат Нүкенованың ағасы, құқық қорғаушы Айтбек Амангелдіден көмек сұрапты. Ол адвокаттар тауып берген екен. 
БАҚ-та хабарланғандай, бұл оқиғаға қатысы бар бірнеше күдікті бұған дейін де түрлі қылмыстар бойынша жазаға тартылған. Әлеуметтік желіде бұл ұйымдасқан банда деген пікірлер де көптеп тарап жатыр.



Telegram Qaz - t.me/QazAqparat_kz
Telegram Rus - t.me/kazinform_news
Instagram - / @kazinform_kz
Instagram - / @kazinform
Facebook - / @Kazinform
Facebook - / @Казинформ

Jibek Joly online: https://jjtv.kz/kk/live
Cайт - https://kaz.inform.kz/

#kazinform #қазақпарат #Жаңалықтар