Театр актерларына құрмет көрсетілді

27 наурыз - Халықаралық театр күні. Атаулы мерекеге орай Нартай Бекежанов атындағы облыстық қазақ академиялық музыкалық драма театрында «Көңілімнің көктемісің, театр!» атты шығармашылық кеш өтті. Салтанатты шарада Сыр сахнагерлеріне құрмет көрсетіліп, түрлі номинациялар табысталды.

Бүгінде елімізде алпыстан астам театр болса, олардың арасында Нартай Бекежанов атындағы облыстық қазақ академиялық музыкалық драма театрының шоқтығы биік. Себебі, 1955 жылы Талдықорған қаласында құрылған қазақ театры 1960 жылы Қызылорда қаласына көшіріліп, Нартай Бекежановтың аты берілді.

МҰХТАР НИЯЗОВ - Н. БЕКЕЖАНОВ АТЫНДАҒЫ ОБЛЫСТЫҚ ҚАЗАҚ АКАДЕМИЯЛЫҚ МУЗЫКАЛЫҚ ДРАМА ТЕАТРЫНЫҢ ДИРЕКТОРЫ \Бүлдіршіндерден бастап сонау еңбектеген баладан еңкейген кәріге дейінгі екі ортадағы адамдардың барлығының талғамы бірдей емес. Бірақ біз солардың барлығына да театрдан көретін, эстетикалық ләззат сыйлайтын рухани дүниелерді тауып беруіміз керек... \

Иә, театр – өмір айнасы, тәрбие ошағы. Ғабит Мүсірепов «Театр - хас сұлудың көз жасындай мөлдір өнер» десе, Шәкен Айманов «Театр - адамның өзін-өзі сахнадан көріп, өзін-өзі түсінетін орын» деп баға берген. Сондықтан театр сахнасында қойылған әрбір спектакль, әрбір рөл көрерменге ой салары анық. Салтанатты шарада жыл бедерінде үздік образдарды сомдап, халықтың құрметіне бөленіп жүрген театр актерлары мен сахна сыртындағы кіші қызметкерлер марапатталды.

Қазақстанның еңбек сіңірген қайраткері Кәмила Әбжановаға «Дара» төсбелгісі табысталса, театр актерлары Серік Төлепов, Нұрлыбек Шналиев және Зәуре Көздібаева кәсіподақ ұйымының «Еңбек даңқы» төсбелгісімен марапатталды. Ал, «Шанель №5» спектаклінің режиссері Бахытбек Темірбеков «Жыл жаңалығы» номинациясына ие болса, Ердаулет Мәмуов «Жыл актері» атанды. Сондай-ақ театрдың тұрақты көрермені Сандуғаш Әкімбекқызына «Жыл көрермені» номинациясы табысталды.
Мерекелік кеште театр артистері концерттік бағдарлама қойып, көрермен қошеметіне ие болды.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/