ҚАЗАЛЫ АУДАНЫ ЖЫЛДЫ ҚОРЫТЫНДЫЛАДЫ

Қазалы ауданында жылды қорытындылауға арналған мерекелік жиын өтті. Жылжабар шарада өңірдің өсіп өркендеуіне үлес қосып жүрген әр саланың үздіктері марапатталып, арнайы номинацияға ие болды. Ауданда сондай-ақ бірқатар нысан ашылып, ел игілігіне берілді.

95 жылдық тарихы бар Қазалы ауданы қоян жылын табысты түйіндеді. Ауданда инвестиция көлемі артып, өнеркәсіп өндірісі жанданды. Құрылыс қарқын алып, көптеген әлеуметтік нысандар пайдалануға берілді. Атап айтсақ, «Қуатты өңірлер ел дамуының драйвері» ұлттық жобасы аясында 50 отбасы баспаналы болса, Жанқожа батыр ауылында 300 орындық «Жайлы мектептің» іргетасы қаланды. Кеше ғана Бозкөл, Кәукей ауылдарында дәрігерлік амбулаторияның құрылысы аяқталып, ел игілігіне берілді. Мұнан бөлек спорт кешендері мен ойын алаңдары салынды. Елді мекендердің жолы жөнделіп, газдандыру, ауыз сумен қамту жұмыстары қолға алынды.

МҰХТАР ОРАЗБАЕВ – АУДАН ӘКІМІ
\Биыл аудан қатарынан төртінші рет ауыл шаруашылығы саласында «Озат аудан» атанды. Әйтеке би кенті «Үздік аудан орталығы» номинациясы бойынша үшінші орынды еншілеп, жаңа ассенизатор мен жол тазалайтын көлікке қол жеткізді. Ал, жуырда ғана аталған номинация бойынша Қазалы ауданы екінші орынға орнығып, тағы да қалдық тасымалдайтын «Камаз» автокөлігі мен жол тазалағыш трактор иеленді\

Жаңа жыл қарсаңында Бекарыстан би ауылында әкімшілік ғимараты мен Қазалы қаласында спорт кешені ашылды. Жеке кәсіпкердің демеушілігімен салынған спорттық нысанда күрес, бокс және жаттығу залы бар. Жаңа ғимараттың ашылу рәсіміне қатысқан аудан әкімі тұрғындарды жаңа жылмен құттықтап, игі лебізін жеткізді. Сондай-ақ ауданның әлеуметтік экономикалық дамуына үлес қосып жүрген түрлі сала үздіктерін марапаттап, «Жыл үздігі» номинациясын табыстады.

Мерекелік жиында Руслан Бөлекбаев «Жылдың үздік кәсіпкері» номинациясын иеленді. Жас кәсіпкер өткен жылы өндірістік цех ашып, сабынның бірнеше түрін және ыдыс, кір жууға арналған сұйықтық шығаруды қолға алған болатын. Шара соңында аудан өнерпаздары жергілікті ақын Жетіскен Мәкеналының сөзіне жазылған «Қазалы вальсі» әнін орындап, кештің шырайын аша түсті.

Сайт - https://qyzylordatv.kz/ru/live
Facebook - https://www.facebook.com/qyzylordatv/
VK - https://vk.com/qyzylordatv
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/