Құтқарушылар үйлеріне оралды

Табиғат тосын мінез танытып, топан су басып қалған аймақтарға көмекке аттанған Арал аудандық құтқарушылар аман-есен үйлеріне оралды. Олар екі ай бойы күн-түн демей тұрғындарды эвакуациялап, бөгеттер мен жағалауларды нығайтып, қауіптің бетін қайтаруға атсалысты.

Қостанай, Орал, Ақтөбе және Атырау облыстарында төтенше жағдай орын алғанда Сыр өңірінен 101 адамнан тұратын құтқару жасағы жұмылдырылып, көмекке аттанған болатын. Соның 42-сі Арал аудандық №3 мамандандырылған өрт сөндіру бөлімінің қызметкері. Олар өздерімен бірге 30 су соруға арналған мотопомпа мен 8 қайық және оннан аса арнайы техниканы ала кетіп, 5 мыңнан аса тұрғын мен мыңдаған малды қауіпсіз жерге көшірді. Сондай-ақ, тікұшақпен елді мекендердегі шаруа қожалықтарына азық-түлік пен дәрі-дәрмек жеткізіп, зақымдалған электр бағаналарын қалыпқа келтіруге атсалысты. Қапшықтарға құм толтырып, бөгеттерді нығайтуға күш салды.

Аралға оралған құтқарушыларды аудан тұрғындары мен олардың отбасы мүшелері сән –салтанатпен күтіп алды.

КЕТЕ-ТӨЛЕБИ БЕРЖАНОВ – АУДАН ӘКІМІНІҢ ОРЫНБАСАРЫ //Су басқан аймақтарда тынбай еңбек етіп, игілікті істің бел ортасында болған Қызылорда облысынан аттанған құтқарушылармен қауышып отырмыз. Сіздер сындарлы сәтте құтқару жұмыстарын біліктілікпен атқарып, ұмытмастай ерлік істерін көрсете білдіңіздер. Өз мамандықтарыңызға сай жұмыстарыңызды мінсіз атқарып, көрсеткен нәтижелі жұмыстарыңыз үшін баршаңызға алғыс білдіремін.//

Сәуір айының басында Қостанай облысы, Амангелді ауданында жиналған қарғын судың деңгейі бір жарым метрге дейін көтерілді. Сол сәтте Арал аудандық №3 мамандандырылған өрт сөндіру бөлімінің автокөлік жүргізушісі Наурызбек Едігеев өзінің арнайы көлігімен суды сорып, тұрғындарға қол ұшын созды.

НАУРЫЗБЕК ЕДІГЕЕВ – АРАЛ АУДАНДЫҚ №3 МАМАНДАНДЫРЫЛҒАН ӨРТ СӨНДІРУ БӨЛІМІНІҢ АВТОКӨЛІК ЖҮРГІЗУШІСІ //Бөгеттерді нығайтып, су шайған үйлердегі адамдарды эвакуациялап, онан қалды жан-жануарларды қауіпсіз жерге шығардық. Құтқару жұмыстары кезінде қатты қиындықтар болған жоқ. Жігіттер күн-түн деген жоқ. Үздіксіз қызмет атқарды. Барған өңірдегі тұрғындар дән риза.//

ЖАСҰЛАН ТҮЙМЕНОВ – ОБЛЫСТЫҚ ТЖД БАСТЫҒЫНЫҢ ОРЫНБАСАРЫ //Бұл қызметкерлер қазіргі заманның нағыз батырлары. Біздің сала халықтың алғысын алатын мамандық. Аман есен үйлеріне оралған қызметкерлердің отбасыларына бақ-береке тілеймін. Алдағы жұмыстарына сәттілік тілеймін. Енді осындай оқыс оқиға мен төтенше жағдай елімізде орын алмасын.//

Айта кетейік, төтенше жағдай кезінде еліміздегі құтқарушылардың бірлескен жұмыстарының нәтижесінде 25 ауылдағы 2 мыңнан астам тұрғын үй судан аман қалды. Қазір аталған өңірлерде жағдай тұрақты.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/