Әлеуметтік саладағы серпін

Өңірге жұмыс сапарымен келген Еңбек және халықты әлеуметтік қорғау вице-министрі Назгүл Сағындықова бірқатар әлеуметтік қызмет көрсету орталықтарының жұмысымен танысты. Ведомство өкілі сала мамандарының жұмысын оң бағалап, бірқатар бастамаларға тоқталды.

Балаларға арналған әлеуметтік қызмет көрсету орталығы еліміз бойынша кәсіби түрде жабдықталған бірден-бір нысан. Бүгінде мұнда 100-ден астам жеткіншек сауықтыру шараларынан өтіп жатыр. Орталықта арнайы әдістеме бойынша әр балаға жеке-жеке қызмет көрсетіледі. Әсіресе, тірек-қимыл жүйесі бұзылған балғындармен ерте кезеңнен бастап жұмыс жасалса, оң нәтиже шығады, дейді мамандар.

Бұл нысан 2012 жылы пайдалануға берілген. Содан бері жүздеген жеткіншек сауықтыру шараларынан өтіп, қалыпты өмірге қадам басты. Биыл «Қазақстан халқына» қоры арқылы 13 түрлі құрылғы сатып алыныпты. Қазір мамандар жаңа аппараттарды тиімді пайдаланып отыр. Назгүл Ерікқызы әр балғынмен тікелей тілдесіп, өнерлерін тамашалады.

Орталық жұмысымен танысқан сала жетекшісі мұндағы жаңашылдықтарды оң бағалады. Мұнан соң мамандармен жүздесіп, әлеуметтік бағыттағы бастамалар төңірегінде ақпар берді. Биыл министрлік тарапынан бірқатар пилоттық жобалар қолға алынуда. Соның бірі оңалту құралдарын жеке таңдау тетігі. Яғни, әлеуметтік көмек алушы қажетті құрал-жабдықты кәсіби маманның нұсқауымен өзі таңдай алады. Мұнан бөлек үй жағдайында оңалту жобасы да іске қосылмақ. Аталмыш бастамалар әзірге бірнеше өңірде ғана енгізіліп отыр.

Әлеуметтік сала жетекшісі қала іргесіндегі иппотерапиямен оңалту кешенінің де жұмысымен танысты. Мұнда қимыл-қозғалысы қиын балаларға 8 түрлі жаттығу жасалады. Әсіресе, атпен серуендеу әдісі тиімділігін көрсетіп отыр, дейді мамандар. Сондықтан алыс аудандарда да келіп бұл қызметке жүгінетіндер көп. Айта кетерлігі биыл әлеуметтік тапсырыс аясында 100-ден астам бала оңалту-сауықтыру шарасынан өтіп жатыр.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/