Өрісті өнер - ортақ қазына

Қасиетті Қазалы топырағында кәсіби өреден көрінген өнерпаздар жетерлік. Ал сол таланттардың көбі аудан орталығында орналасқан Қорқыт ата атындағы өнер мектебінің түлектері. Биыл аталмыш білім ұясының іргесі қаланғанына - 60 жыл. Ал, мизам музыканың қадірін құнттаған Қазақстан Композиторлар Одағының құрылғанына 85 жыл толып отыр. Сондықтан қос тойы қатар келген өнер өкілдері Қазалыда бас қосып, ұрпақ сабақтастығының берік үлгісін көрсетті.

Қазақ топырағында классикалық бағыттағы әуезді әуен Қорқыт атадан бастау алады. Бұл мизам музыканы зерттеуші ғалымдардың ортақ пайымы. Сондықтан саз бен сөздің сырын ұққан өнер қайраткерлері композиторлар одағының 85 жылдығына орай абыз ата атындағы өнер мектебіне арнайы келіп отыр. Оқу ошағының ұжымы қазақтың қонақжай қалпын көрсетіп, қадірлі меймандарды ыстық ықыласпен күтіп алды.

Биыл аймақта «Руханият жылы» деп жарияланды. Осы бастама аясында облыс әкімінің қолдауымен көзден таса, назардан тыс қалып жүрген өнер өкілдеріне құрмет көрсетіліп келеді. Бұл жолы атағы алысқа жайылса да, елде еленбей жүрген классик композиторлар Сыр еліне арнайы шақыртылды. Қарапайымдылықты қасиет төресі санаған жандарды одақ төрағасы Серікжан Құттымбетұлы өзі бастап келген. Олар Қорқыт ата атындағы өнер мектебінің ұжымымен жүздесіп, шәкірттерге шеберлік сағатын өтті.

Бүгінде елімізде 300-ден астам өнер мен музыка мектебі бар. Солардың ішінде Қорқыт ата атындағы өнер ошағы аядай ауданда орналасқанымен атағы алысқа жайылған. Сол үшін де мүйізі қарағайдай өнер өкілдері одақтық мерейтойын осында өткізіп, жастарға жол көрсетуді жөн көріпті. Айта кетерлігі, қазір оқу ошағында 900-ге жуық жас 15 бағыт бойынша білім алып жатыр.

Өнер мектебіндегі тағылымды шара Роза Бағланова атындағы мәдениет орталығында жалғасын тапты. Салтанатты кеште аудан әкімі Мейрамбек Шермағанбет композиторлар одағының 85 жылдығымен сала өкілдерін арнайы құттықтап, одақ төрағасына аймақ басшысының алғысын жеткізді.

Музыкалық фестиваль толықтай жанды дауыста өтті. Озат оқушылардың өнерін тамашалаған көпшіліктің көңілі шат. Бұл кеште «Мырза» атындағы халық аспаптар оркестрі, өнер мектебінің ұстаздары мен шәкірттер бірлесіп, композиторлар одағы мүшелерінің танымал туындыларын орындады.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/