Өңірде нашақорлыққа қарсы күрес шаралары пысықталды

7 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель May 22, 2025

Атырау облысы әкімінің орынбасары Жасұлан Бисембиевтің төрағалығымен нашақорлық пен есірткі бизнесіне қарсы іс-қимылға бағытталған қызметті үйлестіру жөніндегі өңірлік ведомствоаралық штаб отырысы өтті, – деп хабарлайды Өңірлік коммуникациялар қызметі.

Жиында облыстағы психобелсенді заттарға тәуелді азаматтарды емдеу, оңалту және алдын алу шаралары, сондай-ақ кешенді жоспардың орындалу барысы мен өзекті мәселелер талқыланды.

Алғаш болып баяндама жасаған облыстық Денсаулық сақтау басқармасының басшысы Қайсар Абдалиев өңір бойынша 2025 жылдың 4 айында психикалық белсенді заттарды қолдану салдарынан 2500-ден астам адам динамикалық бақылауда тұрғанын мәлімдеді. Оның ішінде 530-ға жуығы есірткіге тәуелді ретінде тіркелген.

– Наркологиялық көмектер кезең-кезеңмен көрсетілуде. Оның ішінде 76 адам стационарлық ем қабылдады, мәжбүрлеп емдеу бөліміне 18 адам жатқызылды. Сонымен қатар ОАҚТ бағдарламасы бойынша 8 науқас емделіп жатыр. 13 адам бұл бағдарламаны сәтті аяқтап, есірткіден бас тартты,– деді Қ.Абдалив.

Атырау қаласы, Жылыой және Мақат аудандары әкімдерінің баяндамаларында да емдеу мен оңалту жұмыстары, алдын алу шаралары қамтылды. Жыл басынан бері Жылыой ауданында 90 адамды қамтыған 4 профилактикалық шара өткізілсе, Мақат ауданында 17 нашақор есепте тұр.

Атырау қаласы әкімінің орынбасары Нұржан Ермұханов жастар мен жасөспірімдер арасында нашақорлықтың алдын алу бағытындағы 204 іс-шара өткенін айтты. Оның ішінде 114 лекция, 9 дөңгелек үстел, 10 семинар, 11 мәдени-спорттық шара және 36 түрлі форматтағы акциялар ұйымдастырылған. Сонымен қатар «Жастар нашақорлыққа қарсы» атты подкастар, бейнероликтер мен форумдар өткізілген.

Жиында сондай-ақ 2023–2025 жылдарға арналған кешенді жоспардың орындалу барысы туралы баяндалды. Жауапты орган өкілдерінің айтуынша, 16 тармақтың төртеуі толық орындалмаған. Атап айтқанда, түнгі клубтардағы рейдтік шаралардың жүйесіздігі, CADCA әдіснамасы негізіндегі жергілікті модельдің қалыптастырылмауы және еңбек шеберханаларындағы өнімнің сатылмауы, яғни облыстық психикалық денсаулық орталығындағы емделушілердің тігін шеберханаларында жасаған түрлі бұйымдарының сатылмай қалуы.

– Жоспарланған жұмыс өз деңгейінде орындалмағандықтан бұл мәселені бақылауда ұстап, нақты нәтижелерге қол жеткізу үшін жүйелі шаралар қабылдау қажет, – деді Жасұлан Бисембиев.

Ол сондай-ақ нашақорлықтың алдын алуда қоғамдық ұйымдармен, БАҚ-пен және білім, денсаулық саласы өкілдерімен тығыз байланыс орнатуды тапсырды.

– Бұл күресте қоғам болып жұмылуымыз қажет. Әр ведомство өз үлесін қосқанда ғана нәтиже болады. Жастарымызды есірткіден арашалау – басты мақсат. Бұл бағыттағы шаралар жүйелі әрі нәтижелі болуы тиіс, – деді облыс әкімінің орынбасары.

Жиын соңында штаб жетекшісі көтерілген мәселелерді отырыс хаттамасына енгізіп, жауапты тұлғаларға тиісті тапсырмалар жүктеді.