18 апреля 2025 г.

18 сәуір – Халықаралық ескерткіштер мен тарихи орындарды қорғау күніне орай, Атырау облыстық тарихи-өлкетану музейінде «Атырау өңіріндегі ортағасырлық зерттеулер нәтижесі» уақытша көрмесі мен Атырау өңірінің тарих және мәдениет ескерткіштерінің фотокөрмесі және интерактивті картаның көрсетілімі өтті.

Көрмені музей басшысының орынбасары С.Газимова ашып, Халықаралық ескерткіштер мен тарихи орындарды қорғау күнімен құттықтады. Тарихи-мәдени мұраны зерттеу орталығының басшысы Т.Достыбаев өңірдегі тарихи нысандарды зерттеу мен қорғау бағытында атқарылып жатқан жұмыстарына тоқталып, Атырау өңірінің тарих және мәдениет ескерткіштерінің фотокөрмесі және интерактивті картаның көрсетілімін таныстырды.

Х.Досмұхамедов атындағы Атырау университетінің қауымдастырылған профессоры, тарих ғылымдарының докторы А.Ахмет Ортағасырлық тарихи-мәдени мұраларымыздың маңыздылығы мен көрмедегі жәдігерлердің халқымыздың терең тамыры, рухани байлығының айғағы екенін атап өтті.

Археология бөлімінің аға ғылыми қызметкері, археологиялық экспедиция жетекшісі М.Әбдіғалиев 2024 жылы жүзеге асқан қазба жұмыстарының барысы мен Сарайшық, Қорғанша қалашықтары мен Таскешу керуен-сарайынан табылған олжалардың ерекшелігіне тоқталып, көрмені таныстырды.

Көрмеге музей археологтарының 2024 жылы өңірдегі үш ірі тарихи маңызы бар (Сарайшық, Таскешу керуен-сарайы, Қорғанша) Ортағасырлық нысандарға жүргізген қазба жұмыстары барысында табылған бірегей жәдігерлер қойылды.
Атап айтқанда:
• Сарайшық қалашығынан табылған: XІІІ-ХІV ғғ тиесілі қыш ыдыстар мен бұйымдар, диірмен тастар, шырағдандар, құбырлар, темір және сүйек заттар, әшекейлер, Алтын Орда кезеңіне тән тиындар мен нумизматикалық материалдар, қазба жұмыстарынан фотосуреттер.
• Таскешу керуен сарайынан табылған: XІІІ-ХІV ғғ тиесілі құмыра сынықтары, шыны фрагменттері, Алтын Орда дәуіріндегі күміс пен қола тиындар,70-тен астам асық түрлері және археологиялық қазбалар сәттерінен фотосуреттер.
• Қорғанша қалашығынан табылған: қыш бұйымдар, шығыр бөлшектері, қыш кірпіштер, асықтар және қазба жұмыстары көріністері.

Көрмені өңір тарихшылары мен археологтары, Х.Досмұхамедов атындағы Атырау университетінің тарих мамандығының студенттері, мәдениет саласының қызметкерлері, өлке тарихына қызығушылық танытқан қала тұрғындары мен қонақтары, мектеп оқушылары және БАҚ өкілдері тамашалады.