24 августа 2026 г.

10 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель Aug 24, 2026

Атырауда жасыл сутек технологиялары бойынша халықаралық оқыту басталды

Сафи Өтебаев атындағы Атырау мұнай және газ университетінде жаңартылатын PtX технологиялары бойынша халықаралық Train of Trainers (ToT) тренингінің офлайн кезеңі басталды. Бес күнге жоспарланған оқытуға Тәжікстан мен Өзбекстаннан, сондай-ақ Алматы, Ақтау, Өскемен, Павлодар, Қарағанды және Атырау қалаларынан 14 маман қатысып жатыр, – деп хабарлайды Өңірлік коммуникациялар қызметі.

24–28 тамыз аралығында өтетін тренинг жоғары оқу орындарының оқытушылары, нұсқаушылары мен сала сарапшыларының техникалық құзыреті мен педагогикалық дағдыларын жетілдіруге бағытталған. Негізгі мақсат – жасыл сутек пен жаңартылатын PtX технологиялары бойынша білікті кадр даярлау жүйесін дамыту және Қазақстан мен Орталық Азияда сутек энергетикасының ұзақмерзімді дамуына қажетті мамандар даярлауға ықпал ету.

Халықаралық тренингке Гамбург қолданбалы ғылымдар университетінің және Жаңартылатын энергия мен энергия тиімділігі жөніндегі құзыреттер орталығының профессоры Себастиан Тиммерберг және International PtX Hub GIZ орталығының инструкторы Элизабет Кригсманн дәріс оқиды.

– Бес күндік тренинг барысында қатысушылар жасыл сутек және жаңартылатын PtX технологиялары бойынша техникалық білім алып, оқытудың заманауи әдістері мен практикалық дағдыларын меңгереді. Оқытуға Қазақстан, Тәжікстан және Өзбекстанның техникалық жоғары оқу орындарынан профессор-оқытушылар құрамы қатысып жатыр, – деді «Сафи Өтебаев атындағы Атырау мұнай және газ университеті» КеАҚ басқарма төрағасы – ректор, экономика ғылымдарының докторы, профессор Гүлзада Шакуликова.

Жасыл сутек мұнай өңдеу, химия өнеркәсібі, металлургия және көлік сияқты көміртек шығарындыларын азайту күрделі салаларды декарбонизациялаудың маңызды бағыттарының бірі саналады. Осыған байланысты жаңартылатын энергия көздері негізінде сутек өндіру технологияларын меңгерген білікті мамандарға сұраныс артып келеді.

Халықаралық тренинг International PtX Hub сарапшыларының қатысуымен Астанадағы Сутек дипломатиясы офисі мен Сафи Өтебаев атындағы Атырау мұнай және газ университетінің серіктестігі аясында ұйымдастырылды.