Арайлым Ақкүмісқызы: «Қамқорлық» оңалту орталығына алғысым шексіз...

Атырау қаласының тұрғыны 29 жастағы Арайлым Ақкүмістің қызы қызылшамен ауырып, энцефалитпен дәрігердің көмегіне жүгінген. Әу баста неврология бөліміне жатып, кейін жан сақтау бөліміне түскен, артынша ауруханада ем алған. Алайда ми зақымданған соң баланың аяқ-қолы істемей қалыпты. Ақ халаттылардың кеңесімен қазір «Қамқорлық» оңалту орталығына ем алып жүр.

«Орталыққа келіп жүргенімізге тура 1 ай болғанда балам жүріп, отырып, адамдармен араласып, жағдайы жақсара бастады. Оның алдында ешкіммен араласқысы келмей бөлектеніп қалған еді. Қазір ортаға бейімделіп, өзі жүретін жағдайға жетті. Арманым –баламды толықтай бұрынғы қалпына келтіру. «Қамқорлық» оңалту орталығына алғысым шексіз, мұндағы мамандар баламен жұмыс істеудің әдіс-тәсілін жақсы біледі», - дейді ол.

Дәл осы орталықта баласын емдетіп жүрген жанның бірі Ақтоты Серікқызы жол апатынан соң ұлының осындай күйге түскенін айтады. Сөйлей алмаған, жөргекпен отыратын. Бірақ екінші оңалтудан соң ақырындап жүре бастапты. Орталықтағы мамандардың көмегімен қазір күн өткен сайын жағдайы жақсарып келеді. Дәрігерлер баланың денсаулығына салғырт қарамауды, дер кезінде екпе алуға кеңес береді.

«Біздің орталық 1-18 жас аралығында балаларға медициналық, психологиялық көмек көрсетеді. Өткен кезеңде жақсы нәтижеге жеттік. Бізге келген балалар жүріп, отырып, еңбектей, сөйлей бастады. Былтыр 900 бала оңалтудан өтіп, 20 бала өздігінен жүре бастады», - дейді Атыраудағы «Қамқорлық» оңалту орталығының меңгерушісі Гүлнәр Мейрамова.

Айта кетейік, инклюзияны дамыту жөніндегі «Қамқорлық» жоба 2019 жылдан басталған. Бұл Нұрсұлтан Назарбаев Қорының бастамасымен жүзеге асқан. Қазір елімізде 15 оңалту, 14 ерте араласу және аутизмі бар балаларға арналған 6 «Қамқорлық» орталығы мен 16 инклюзияны қолдау кабинеті бар. Биыл тағы 6 ерте араласу орталығы және аутизмі және басқа да ақыл-ой кемістігі бар балаларға арналған 3 орталық ашылды.