Атырауда мәдениет және өнер қызметкерлері құрметке бөленді

4 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель May 22, 2025

Мәдениет және өнер қызметкерлері күніне орай Махамбет атындағы академиялық қазақ драма театрында салтанатты іс-шара өтті. Мерекелік жиынға қатысқан облыс әкімі Серік Шәпкенов сала қызметкерлерін құттықтап, шығармашылық табыс пен зор денсаулық тіледі. Аймақ басшысы кез келген ел үшін ұлттық кодты сақтауда мәдениет пен өнердің маңызы зор екенін айтып, оны дамыту жолындағы жұмыстарға тоқталды. Бұл туралы облыс әкімінің баспасөз қызметі хабарлайды.

- Өнер – үлкен күш. Себебі түрлі ұлттың өкілдері бір-бірінің тілін түсінбесе де, өнер арқылы бір арнада тоғыса алады, руханият үндеседі. Мемлекет басшысының тапсырмасына сәйкес өзіміздің ұлттық болмысымызды, өнерімізді сақтау үшін бар жағдайды жасаудамыз. Тек аудан, қала орталықтарында емес, шалғай жатқан елді мекендерде де мәдениет үйі салынып жатыр. Осы орайда өнер арқылы қоғамда өзектілігін жоғалтпаған түрлі мәселе көтеріліп жүр. Мысалы Атырау жастар театры құмар ойындар, дәстүрлі дінімізден бөлек жат ағымдар сынды сан алуан тақырыптағы қойылымдарды көпшілік назарына ұсынып жүр. Мұның барлығын азаматтарымыздың сана-сезімді оятып, қоғамның дамуына қосылып жатқан үлесі деп білемін,- деді Атырау облысының әкімі Серік Шәпкенов.

Айта кетейік, 20 мамыр күні Астанада ҚР Президентінің Жарлығымен ұлттық мәдениетті дамытуға және насихаттауға қосқан айрықша үлесі, мәдениет саласындағы үздік жетістіктері және Қазақстан Республикасына сіңірген еңбегіне байланысты «Ерен еңбегі үшін» медалімен Дина Нұрпейісова атындағы Академиялық қазақ халық аспаптар оркестірінің әртісі, Sarmad этно-фальклорлық ансамбілінің жетекшісі Бауыржан Ақтаев наградталды.

Салтанатты жиында өзге де сала қызметкерлері мен ардагерлері марапатталды. Нақтырақ айтқанда, ҚР Президентінің 2025 жылғы 16 мамырдағы №9398 «Қазақстан Республикасының мемлекеттік наградаларымен наградтау туралы» Жарлығына сәйкес «Құрмет» орденімен Махамбет атындағы академиялық қазақ драма театрының әртісі Күнайым Шаматова наградталды. Осы өнер ұжымының режиссері Гүлназ Қамысбаеваға ҚР Президентінің Алғыс хаты табысталды. ҚР Мәдениет және ақпарат министрлігінің «Еңбек ардагері» төсбелгісі Қызылқоға ауданы «Арман» мәдениет үйі жанындағы «Жумалиевтер» отбасылық ансамблінің жетекшісі Сағат Жұмалиевтың кеудесіне тағылды. Ал «Мәдениет саласының үздігі» төсбелгісі Д.Нұрпейісова атындағы академиялық қазақ халық аспаптар оркестрінің әртісі Алмас Темировқа және Н.Жантөрин атындағы облыстық филармонияның әртісі Нариман Дайровқа берілді. Бұдан бөлек бір топ азамат ҚР Мәдениет және ақпарат, Ғылым және жоғары білім министрлігінің «Құрмет грамотасын» және «Алғыс хатын» иеленді. Сонымен қатар аймақ басшысы өңірдегі аудандық мәдениет үйлері мен кітапханаларда елеулі еңбек етіп жүрген сала мамандарына ризашылығын білдіріп, Алғыс хатын табыс етті.

Салтанатты жиын облыс өнерпаздарының мерекелік концертімен жалғасты.