Жаңаөзенде жүзге жуық мұғалім «күн көрсетпейтін» директорға қарсы шықты

39 Просмотры

Спасибо! Поделитесь с друзьями!

Вам не понравилось видео. Спасибо за то что поделились своим мнением!

Издатель Apr 19, 2026

Жаңаөзенде жүзге жуық мұғалім мектеп директорына қарсы шықты. Ұстаздар жаңа басшы келгелі ұжымның берекесі кетті деп отыр. Себебі, ол білікті мамандарды жұмыстан шығарып, өз адамдарын конкурссыз қабылдап жатыр дейді көпшілік. Сондай-ақ, педагогтарға психологиялық қысым көрсетіп, жұмыс істеуге мұрша бермейтінін айтады. Шыр-пыр болған жандар министрліктен көмек сұрайді. Ұстаздардың жанайқайын әріптесім Махаббат Нұржанқызы тыңдап келді.
№17 жалпы білім беретін мектептің мұғалімдері жаңа директорға жақпай қиналдық деп отыр. Білім ошағының басшысы ұжыммен дөрекі сөйлесіп, кәсіби әдепті сақтамайды. Ол аздай, оқушылардың көзінше дәрежемізді түсіріп, басымызға әңгіртаяқ ойнатады дейді.
ЖАНАР ҚОЖАҒАЛИЕВА, мектеп мұғалімі:
Сабағыма ескертусіз кіріп, сабақ процесін бұзып, даусын көтеріп, маған сабақта кедергі келтірді. Оқушылардың көзінше намысыма тиді. Қазақстан Республикасының еңбек Кодексінің бірнеше баптарын бұзып отыр. Біріншіден ешқандай мәдениеттілік жоқ. Сәлеметсіз бе де жоқ, кешіріңіз де жоқ. Рұқсат та жоқ. Бізге ешқандай тариф бекітілген жоқ, расписание әлі бекітілмеген.
Шырылдаған ұстаздар тегін берілуі тиіс қарапайым ақ қағаз, бор сияқты қажетті құралдарды өз қалтамыздан аламыз деп ашынады. Мазамыз қашты деген мұғалімдер әкімдікке де, білім бөліміне де шағым түсірген. Алайда жауаптылар сөгіспен шектелді дейді.
ҚАНЗИЯ СИСЕНБАЕВА, мектеп мұғалімі:
Осы мектептің ұстаздарының 90 пайызға жақыны осындай психологиялық қысымда және осындай атмосферада жүрміз үш айға жуық. Жаңаөзен әкімдігі біліп отыр осы 73 мұғалімнің сергелдеңде жүргенін. Бірақ көз жұма қарап отыр. Өздеріміз тасимыз борды, ақ бет қағаздар өзімізде. Ең болмаса бір пачка қағаз бер дегенде директордан рұқсат алып кел қол қойдырып деді.
Бүгін түске дейін жұмыста болған директор аяқ асты еңбекке жарамсыздығына байланысты демалыс алыпты. Басы дауға қалған басшымен тілдесу мүмкін болмады. Ал қалалық білім бөлімі ұжымның арызы қаралып, тәртіптік жаза қолданылғанын жеткізді.
САНДУҒАШ САРБЕКОВА, Жаңаөзен қаласы білім бөлімінің сектор меңгерушісі:
Екі тарап түсініспеушілік жалғаса беретін болса тағы да қосымша зерделеу жұмыстарын жүргізетін боламыз. Бірақ директор де педагог. Директор да еліміздің азаматы, құқығы қорғалуы керек. Еңбек кодексі аясында біз айттық жаңағы тәртіптік жазалар қолданылды. Оның да өзінің қолданылатын деңгейі бар. Бұзушылықтың деңгейіне берілетін тәртіптік жаза бар.
МАХАББАТ НҰРЖАНҚЫЗЫ, тілші:
Бірақ ұстаздар жаңа оқу жылында келген директордың жұмыстан кетуін талап етеді. Өйткені, басшының бассыздығы оқу процесіне тікелей әсер ететінін айтады. Сондықтан мұғалімдер жанайқайын оқу-ағарту министрлігіне жеткізуді жоспарлаған.

#Информбюро #Жаңаөзен #мұғалім #мектепдиректоры #31канал