Жылу мен жарыққа жарымай отырған атыраулықтар енді қақаған қыста жылусыз қалды

Атырау қаласының іргесіндегі Жұлдыз-3 ықшамауданының тұрғындары жылу мен жарықтың азабын тартып отыр. Электр қуатының жиі өшуінен жұрт бала-шағасын оқыта алмай сергелдеңге түскен. Жаңа ықшамауданда қыс басталғалы газдың қысымы да төмендеп, бұқара баспаналарын жылыта алмауы да жығылғанға жұдырық болған. Жылу мен жарықтан тарыққан халықтың мәселесін шенеуніктер шешіп беруге уәде берді. Тараптарды әріптесім Жұлдыз Тілеухан тыңдап қайтты.
Жұлдыз-3 ықшамауданының тұрғындары талап-арыздарын айту үшін тайлы-тұяғы қалмай жиналды. Төрт мыңға жуық тұрғыны бар жаңа ықшамауданда жарық жиі өшіп, жұрт «жүйкеміз әбден жұқарды» деп жыларман болды. Базынасын жіпке тізген бұқара «электр қуатының аздығынан жаңадан алған техника атаулы бірінен кейін бірі күйіп бітті» деп қынжылады.
АЙБЕК БІТІМБАЕВ, Атырау қаласының тұрғыны:
– Ең басты тоқ мәселе болып тұр. Ол тоқтың осындай ауа-райы салқындай бастағанда немесе жаңбыр жауғанда мезетсіз сөніп қалуы. Кешқұрым әсіресе. 4-5 күн бұрын сөнді, кешкі сағат 7 жарымда сөнген.
АЗАМАТ БАБАЖАНОВ, Атырау қаласының тұрғыны:
– Талабымыз әкім бізге сабырға шақырып, алдап отырады. Үйімізді құттай балалар бар, тоңазытқыш жанып кетті. Кім жауапты оған, жарық сөнгенде ватсапқа жазамыз, 109-ға хабарласамыз.
Жарықпен қоса мардымсыз жылудың мәселесі де жұрттың жанына батқан. Қыс басталғалы газ қысымы төмендеп, қараша баспаналарында бүрсең қағып отыр.
МАСРИПА ЕСЕНҒАЛИЕВА, Атырау қаласының тұрғыны:
– Соңғы 2 жыл уақытта осы жарықтың кесірінен отопление де жоқ. Свет болмағанда отоплениесіз де қаламыз. Үйдегі құрал жабдықтарымыз электронды істен шығып қалады. Соңғы 2 жыл бойы көрген қорлығымыз осы.
Жалпы Жұлдыз -3 ықшамауданында 8 трансформатор бар. Шенеуніктер тозығы жеткен жарық желілерін ауыстыру жоспарланғанын жеткізді. Бірақ жаңа жобаның нақты қашан жүзеге асатыны әзірге белгісіз.
ЖАСҰЛАН МҰҚАШЕВ, Атырау қалалық тұрғын үй коммуналдық шаруашылық бөлімінің сектор меңгерушісі :
– Басты желіні ауыстыру үшін заманауи желіге ауыстыру үшін жобалық сметалық құжаттар жасалып жатыр қазіргі уақытта.Ол осы жылы жоба нақты аяқталып, оң сараптама алса, сәйкесінше қаражат көзіне байланысты жөндеу жұмыстары басталады.
Әкімдіктегілер тұрғындарды алаңдатқан мәселелерді биыл толық шешіп беруге тырысамыз деп отыр. Бірақ жұлдыздықтар көптің жанайқайы сылдыр сөз, құрғақ уәдемен шектеліп қалмаса екен деп тілейді.





Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#Информбюро #31арна #Жаңалықтар #БастыЖаңалықтар #Нашиновости #Сегодня #Қазақстан #31канал