Қақаған қыста үйдің ішінде бүрсең қағып отырған атыраулықтар шу көтерді

Атырауда тұтас ықшамауданның жұрты қытымыр аязды жылусыз отыр. Қала ішіндегі 30-ға жуық жер үйде газ қысымы төмендеп, кейбірінде тіптен сөніп қалған. Қақаған қыста қараша далада емес, үйдің ішінде бүрсең қағып жүр. Азынаған баспанада жүру мүмкін емес деген жұрт табиғи газдан тарығу жыл сайын қайталанатын жағдай деп күйінеді. Ал жылуға жауапты компанияның басшысы мәселені шешуге тырысып жатқандарын айтады. Тараптарды өңірдегі әріптесім Жұлдыз Тлеухан тыңдап келді.
ЖҰЛДЫЗ ТЛЕУХАН, тілші:
– Тұрғындар мұндай қиындықтар әр қыста болатынын айтып ашынды. Желтоқсанның ызғарында дірдек қаққан жұрт осылайша көрпе жамылуға мәжбүр. Сондықтан олар мәселенің тез арада шешілуін талап етіп отыр.
Үйінде бойын жылыта алмай отырған көптің бірі - Мая Молдағалиева. Көпбалалы ана әсіресе кішкентай бүлдіршіндерінің денсаулығына алаңдайды.
МАЯ МОЛДАҒАЛИЕВА, Атырау қаласының тұрғыны:
– Үйдің іші сап-салқын, жүрісіміз мынау. Көрпе жамылып, бала-шағамыздың бәрін көрпенің астына тығып отырмыз. Мынау масқара емес пе?! Ауру боп өлетін болдық. Жылу беріңдер біздерге бұл не сұмдық?! Бәрі жылап көшеде жүр.
Қала ішіндегі "Ақ Депо" ықшамауданында 30-ға жуық отбасы түтін түтетіп отыр. Жұрт қақаған қыста газдың қысымы қатты бәсеңдеп кеткенін айтады. Тіпті, кейбірінде мүлдем өшіп қалған. Ал, жылуға жауапты компанияның өкілдері тереңдігі 50 метрде жатқан құбырдың қысымын күшейту үшін барымызды салып жатырмыз деп ақталды.
ЕРКЕБҰЛАН КЕНЖЕҒАЛИЕВ, "ҚАЗТРАНСГАЗ АЙМАҚ" АҚ Атырау өндірістік филиалының директоры:
– Бұл жерде мынау құбыр қысылып қалған астынан закупорка дейді ғой, газ құбыры тоқтап қалған. Қысым азайып кетіп тұр. Сондықтан қазір біздер жасап жатырмыз. Материал, техникамыз бар. Жылуды бүгіннен қалдырмай береміз. Қазір жұмыстар жүріп жатыр.
Компания басшысы табиғи газға қатысты мәселені ертеңге дейін шешіп беруге уәде берді. Ал, аязды күндері жылудан тарыққан жұрттың дені туыстарын уақытша паналаймыз деп тарқасты. Себебі, суықта баспана ішінде отыру мүмкін емес дейді.




Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал