Нұрдос Сабыр - ауыр атлетикадан әлем чемпионы

Спорт әлемінен ақжолтай ақпар! Қызылордалық спортшы Нұрдос Сабыр - ауыр атлетикадан Әлем чемпионы атанды. Перу астанасы Лимада жасөспірімдер арасында өткен чемпионатта бабы мен бағы қатар жанған спортшы бүгін туған жерге оралды.

Ыстық ықылас, зор құрмет. 17 жастағы Әлем чемпионын қызылордалықтар қошеметпен күтіп алды.

ЕРСҰЛТАН ОҢҒАРОВ - ЖАТТЫҚТЫРУШЫ
«Осы жылы Өзбекстан мен Армениялық спортшыларды ұттық. Біраз нәтижемен ұттық енді. Негізі табиғи таланты күшті бала, мықты бала. Техникасын түзедік, біраз жұмыс жасадық. Өзінің табиғи күші бар. 2019-дан бері тренировканы тоқтатқан жоқпыз. Соның нәтижесін көрсетіп отыр. енді жастар арасындағы олипиадаларға дайындаламыз».

Нұрдос Сабыр зілтемір көтеруге 13 жасында келген. Содан бері спорттан қол үзген емес. Жас балуан әрбір жеңістің артында күн сайынғы жаттығу мен табанды еңбек жатыр дейді.

НҰРДОС САБЫР - АУЫР АТЛЕТИКАДАН ЖАСӨСПІРІМДЕР АРАСЫНДА ӘЛЕМ ЧЕМПИОНЫ
«2016 жылы спорт мектебіне әжем алып келген болатын. Содан бастап спортты қуалап жүрмін. Айналысып жүргеніме 8 жыл болды. Құдай қаласа арманым олимпиада медалі. Ағайларыма ең алдымен ата-анама, тәрбиешілеріме алғысымды білдіремін».

ГҮЛЖАЗИРА ЖАРЫЛҚАСЫНОВА - ЖАЛАҢТӨС БАҺАДҮР АТЫНДАҒЫ ОБЛЫСТЫҚ МАМАНДАНДЫРЫЛҒАН ОЛИМПИАДАЛЫҚ РЕЗЕРВТЕГІ МЕКТЕП-ИНТЕРНАТ-КОЛЛЕДЖІНІҢ ТӘРБИЕШІСІ
«Бұл облыстық мектеп интернат колледжі болғандықтан, бұл жерде барлық бала көп уақытын осы біздің жатақханада, интернатымызда өткізеді. Сондықтан мен осы Нұрдосымның екінші анасы ретінде сәттілік тілеймін. Олимпиада чемпионы болуына тілекшімін. Нұрдос өзі елгезек, ақкөңіл, бауырмал бала».

Облыстық мамандандырылған олимпиадалық резервтегі мектеп-интернатында 24 бапкер 230 -ға жуық баланы тәрбиелеуде. Олардың спорттық жетістікке жетуіне мұндағы әр тәлімгерлердің еңбегі орасан зор. Айта кету керек, тамыз айында Францияда ауыр атлетикадан жастар арасындағы олимпиада өтеді. Нұдос Сабыр енді сол байрақты бәсекеге дайындалады.

Сайт - https://qyzylordatv.kz/ru/live
Facebook - https://www.facebook.com/qyzylordatv/
Instagram - https://www.instagram.com/qyzylordatv/
Telegram - https://t.me/qyzylords_tv
Tiktok -https://www.tiktok.com/@qyzylorda_tv/