Тараздың тазалығына жауапты жұмысшылары басшылықтың жұмыстан кетуін талап етіп, шу көтерді

Бүгін Жамбыл облысы әкімдігі айғай-шудың ордасына айналды. «Жасыл-Тараз» мекемесінің жұмысшылары жаппай наразылыққа шығып, басшылық құрам жұмыстан кетсін деген талап қойды. Айтуларынша жергілікті билік жалақыларының жартысын жұрт аузынан жырып қалған. 100 пайыз әкімдіктен қаржыландыратын серіктестіктің қаражаты кімнің қалтасында? 4,5 млрд бюджеті бар мекеме қалай банкроттықтың алдында қалды?! Әріптесім Нұрадин Рақай болған жайды баяндайды.
Тараздық тазалық сақшылары бүгін көшенің емес шенеуніктердің шаңын қағуға шықты. Сыпырғышпен емес, сөзбен. Қызылды-жасылды киініп, автобуспен әкімдікке ағылды
Әкімдік алдындағы шу шенеуніктерді біраз састырды. Былтырдан бері басы даудан арылмаған мекеменің жұмысшылар айлығын екі есеге азайтқаны көптің ашуын тудырған.
АЙНҰР ТҰРСЫНБАЕВА, Демалыс орындарының бригадирі:
– Қашан қарасақ қарызбыз. Қарызбыз дейді. Сонда қарапайым жұмысшының, қала тазалығын қарап жүрген қарапайым жұмысшыны менсінбей ме? Әлде қарапайым халыққа айлық беруге қинала ма?
АЙНҰР АМАНБАЕВА, көше сыпырушы:
– Уәдесінде тұра алмады. Көп балалы анамын. Қалай асыраймын кредитке кіріп отырмын. Біз сексен мың айлықпен қалай күн көреміз?
Ірілі-ұсақты барлық шенеуніктер келгенмен бұқараға басу айта алмады. Анығы айтқанда уәждері бос сөз, шығарып салудың амалы дейді тұрғындар. Сондықтан облыс әкімінің өзі шығуын талап етіп тулады.
Жыларман болған жұртқа жұбаныш сөзін таппады ма, жоқ жиналыс желеу ме әйтеуір облыс әкімі төбе көрсетпеді. Ашулы топ амалсыз осылайша қала әкіміне ағылды. Ал серіктестіктің бұған дейінгі ахуалын айтқан қала әкімі бұрынғы басшылар кезінде мекеменің қарызға белшеден батқанын жеткізді. Айғайла, аттанда бәрібір жұрт айтқан айлық болмайды деді. Үміті үзілген көп үре түре келді..
Айта кетейік «Жасыл-Тараз» мекемесінің ереуілі Жамбылда дәстүрге айналған. Бұған дейін де бірнеше мәрте бас көтеріп, әкімдік уәдесін орындағандай болған. Былтыр бар кінәні бұған дейінгі басшыларға сілтеген жауаптылар бүгін амалсыз ел күткен жауапты айтуға мәжбүр болды.
БАҚЫТЖАН ОРЫНБЕКОВ, Тараз қаласының әкімі:
– Бірінші наурыздан бастап айлықтарыңды қайтадан 160 қыламыз. Екіншіден биыл толық штатқа қабылдаймыз.
Бұған дейін бюджеті 1 млрд 500 млн болған мекемеде бұрын-соңды айлық мәселесі көтерілмепті. Тек соңғы екі жылда серіктестік әмиянына әкімдік 4 млрд 500 млн бөлген. Бірақ сол қаржы қарапайым жұмысшыларға бұйырмай тұр. Өйткені салық және түрлі мекемелер алдында берешегімізді бір жыл бойы қайтардық дейді қазіргі басшы. Ал мол қаржының кімнің қалтасына кеткенін қазір құзырлы органдар анықтауда дейді.
АЗАМАТ ӘБІШОВ, «Жасыл-тараз» ЖШС директоры:
– Ол бойынша іс жүріп жатыр. Кімге іс қозғалды. Ол бойынша құзырлы органдар бізге айтпай жатыр.
Айта кетейік «Жасыл-Тараз» мекемесінде былтыр жаппай қысқарту болып, жұмысшыларды биржаға тіркеп, үкіметтің есебінен ең аз айлық тағайындаған еді. Яғни 80 мыңдық айлықты жұмыспен қамту бөлімінен қаржыландырып, қалғанын мекеменің табысынан төлеген еді. Биыл бұл тәукелге бара алмаймыз дейді әкім. Сондықтан бүгін уәде еткен сөзін қалай жүзеге асыратынын өзі де білмейді.





Бізді әлеуметтік желіде оқыңыздар:
Информбюро 31 https://www.youtube.com/@informburo31kanal
Informburo kz https://www.youtube.com/@informburokz2022
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#Информбюро #31арна #Жаңалықтар #БастыЖаңалықтар #Нашиновости #Сегодня #Қазақстан #31канал